Alizée

Ord Wikipedia
Questa pagina è scritta en puter.
Alizée

Alizée Jacotey, meglder cuntschida be scu Alizée (Ajaccio, 21 avuost 1984) es üna chantadura francesa da musica da pop. Ella es renumneda specialmaing per sia prima chanzun, Moi... Lolita, dal 2000, chi ho gieu fich success in tuot il muond.

Carriera[modifitgar | modifitgar il code]

Ils inizis e'l prüm album[modifitgar | modifitgar il code]

Alizée gnit scuverta da la chantadura Mylène Farmer e dal chantautur Laurent Boutonnat, chi dvantent sieus produzents.

Ils 4 lügl 2000 gnit publicheda sia prüma chanzun, Moi... Lolita, chi anticipaiva la publicaziun da sieu album Gourmandises ("Delicatezzas"). La chanzun vet fich success dalum in Frauntscha e zieva in bgers oters naziuns, taunt in Europa scu in l'Orient Extrem; in Svizra ragiundschettan la chanzun Moi... Lolita e'l DC Gourmandises l'11., resp. la 27. posiziun da la parada da hits.

In duos ans gnit vendieus 4 milliuns copchas da Gourmandises, dal quêl gnit publicheda eir las chanzuns L'Alizé, Gourmandises (posiziuns 23., resp. 70. da la parada da hits svizra) e Parler tout bas ("Parler da bass", publicheda be in Frauntcha e Belgia).

Vi da quist album guadagnet Alizée bgers premis, scu l'"NRG Music Awards", il "World Music Awards" e l'"M6 Awards".

Il seguond album[modifitgar | modifitgar il code]

Eir il seguond DC d'Alizée, Mes Courants Électriques ("Mieus currents electrics"), gnit prodüt da Mylène Farmer e Laurent Boutonnat. El gnit publicho ils 18 marz 2003 in Frauntscha insembel cun la chanzun J'en ai marre! ("Eau and he avuonda!").

Album e chanzun vettan bun success in Europa ed Asia; in Svizra ragiundschettane la 13., resp. la 5. posiziun illa parada da hits. Da l'album gnint publichedas eir las chanzuns J'ai pas vingt ans ("Eau nun he vainch ans", 60. in Svizra) e À contre-courant ("Cunter il current", 64. in Svizra).

Da las chanzuns J'en ai marre! e J'ai pas vingt ans existeschan eir las versiuns in ingles, clamedas I'm Fed Up!, resp. I'm Not Twenty, amenduos chantedas da Alizée svessa.

Zieva la publicaziun da Mes Courants Électriques ho Alizée fat üna turnea tres tuot la Frauntscha: in poch temp gnint tuots ils bigliets dals concerts vendieus.

Il terz album[modifitgar | modifitgar il code]

Ils 27 settember 2007 gnit our la chanzun Mademoiselle Juliette ("Giunfra Juliette"), chi procedet la publicaziun, ils 3 dicember 2007, dal terz album d'Alizée, Psychédélices ("Psiche-dalets"), prodüt da Bertrand Burgalat, Daniel Darc, Oxmo Puccino, Jean Fauque e Jérémy Châtelain.

Dal favrer 2008 gnit publicheda ün'otra chanzun da quist'album, Fifty-Sixty ("Tschinquaunta-Sesaunta").

In Svizra nu vet Psychédélices fich success: pelvaira, el ragiundschet be la 99. posiziun da la parada da hits.

Otras lavuors concernant Alizée[modifitgar | modifitgar il code]

Dasper ils trais albums menziunos, gnint publichos oters duos albums d'Alizée:

  • Alizée en Concert (2004), registro düraunt la turnea dal 2003, chi vet success in Frauntscha e specialmaing in Mexico (8. posiziun da la parada da hits);
  • Tout Alizée, publicho in Mexico dal 2007, chi met insembel las megldras chanzuns d'Alizée.

Vita privata[modifitgar | modifitgar il code]

Alizée ho marido il chantadur frances Jérémy Châtelain dal 2004; ils haun üna figlia, Anny-Lee, naschida ils 29 avrigl 2005.

Tuot ils lavuors d'Alizée[modifitgar | modifitgar il code]

Albums[modifitgar | modifitgar il code]

  • Gourmandises (2000)
  • Mes Courants Électriques (2003)
  • Alizée en Concert (2004) - registraziun directa
  • Psychédélices (2007)
  • Tout Alizée (2007) - collecziun

DC singuls[modifitgar | modifitgar il code]

Da Gourmandises[modifitgar | modifitgar il code]

Da Mes Courants Électriques[modifitgar | modifitgar il code]

  • J'en ai marre!/I'm Fed Up! (2003)
  • J'ai pas vingt ans/I'm not Twenty (2003)
  • À contre-courant (2003)

Da Psychédélices[modifitgar | modifitgar il code]

  • Mademoiselle Juliette (2007)
  • Fifty-Sixty (2008)

Colliaziuns[modifitgar | modifitgar il code]