August

Questa pagina è scritta en sursilvan.

August (lat. augustus; grec. σεβαστός sebastós - il venerabel, il maiestus, il sublim) ei in tetel da honur dils imperaturs romans. Il tetel d‘august ei vegnius attribuius per l’emprema gada agl imperatur Octavian egl onn 27 a. Cr. entras il senat. En sia successiun ei quest tetel vegnius utilisaus da quasi tut ils imperaturs romans. Duront il temps dalla tetrarchia romana vegneva igl Imperi roman guvernaus da dus augusts e da dus cesars. En quei temps han era las consortas ni datier parentas dils imperaturs retschiert il tetel d’augusta.

Egl Imperi bizantin ei quest tetel vegnius surprius per ils imperaturs en la fuorma greca da sebastós. Entuorn igl onn 629 substituescha igl imperatur bizantin Heraclius I. il tetel cun basileus.

Cun l’encorunaziun ha Carli il Grond era surpriu il tetel d’august. Quest tetel ei vegnius salvaus dils imperaturs dil Sogn Imperi roman.