Capuns
Ord la Wikipedia
Capuns è il num d'in plat (d’ina tratga) tradiziunala ord il chantun Grischun. I sa tracta da pachets da pasta da bizochels enritgids cun ervas e tochets da charn setga enzugliads en feglia d'urtais da tagliar. Cotgs vegnan quels pachets en latg e buglion e servids cun chaschiel sgrattà. I vegn pretais ch’i dettia en Grischun tants recepts per far capuns sco siras.
[editar] Bleras variantas
Sco emprim dovri ina simpla pasta da bizochels che consista ord farina, latg ovs ed ina presa sal. A la pasta vegn agiuntà charn setga tagliada en quadrels. Tut tenor usanza pulpa, andutgels u schambun criv taglià en quadrels. Era ervas na dastgan betg mancar. Qua sa tracti per il pli da tschagugliuns, peterschigl ed erva tschurra. Sco quai ch’i è era enconuschent tar ils bizochels vegn magari er agiuntà tar ils capuns ivettas.
Mintgin che fa capuns ha lura er in pau si’atgna metoda da pachetar la pasta en ils urtais (la feglia d'urtais da tagliar vegn era numnada feglia da capuns). Ils ins ferman la cua da l’urtais uschia ch’i na crodan in or da l’auter, auters dovran tgiradents per far quai. Lura è era anc in’autra varianta da vesair en las chasas grischunas. La varianta da betg enzugliar la pasta cun ils urtais mabain mo far simpels bizochels e metter latiers ils urtais tagliads e laschar coi quai uschia en aua da sal.
Era tar il coier ils capuns datti differentas metodas. Ils ins brassan l’emprim ils capuns e coin pir suenter els ils auters coin directamain ils capuns en latg e buglion (mez latg e mez buglion) savens era anc cun in moni d’erva tschurra. Era l’avnaun a vapur fa in bun servetsch. Lura na crodan ils capuns betg in ord l’auter. Servids vegnan ils capuns sa chapescha tar mintgin in pau auter. Ins po prender els or dal bugl metter chaschiel sgrattà surengiu e laschar gratinar quels. Auters servan ils capuns cun chaschiel el lura paintg culà u quadrels da charnpiertg surengiu.
[editar] Colliaziuns
[editar] Litteratura
- Jacky Donatz, Chasper Pult: La cuschina dal Grischun. Lenzburg 2007, ISBN 978-3-03780-299-1
- Charly Bieler, Evelyn Lengler: Capuns. Chur 1999, ISBN 3-85637-248-2
- Charly Bieler, Evelyn Lengler: Capuns Geschichten (mit 129 neuen Rezepten). Desertina Verlag, Chur 2006, ISBN 3-85637-306-3
