Dardin
Ord la Wikipedia
Dardin è ina fracziun da la vischnanca da Breil ed è situà amez la spunda tranter Breil vitg e Danis/Tavanasa. Il vitg dumbra oz radund 170 abitants.
Il num dal vitg vegn menziunà per l'emprima giada en il Testament da l'uvestg Tello l'onn 846 s. Cr. cun la furma Ardunae (in num da derivanza celtica 'Are Dunon' = sper la tur). Il num cumpara en ils documents adina puspè en la furma 'Arduna' ni 'Ardin' e quai fin la mesadad dal 19avel tschientaner. Da lura davent vegn la furma 'Dardin' adina pli usuala.
Sin il Grep Patnasa sut il vitg chattan ins scaluttas preistoricas probablamain dal temp da Bronz.
Dardin na furma betg in vitg cumpact, mabain è in conglomerat da differents aclauns: Capeder, Gliz, Patnasa, Caprè, Capaul, Casu, Casut che furman en lur totalitad il vitg da Dardin.
Interessant è ch'i deva sper ils aclauns existents anc ulteriuras fracziuns dal vitg. Enconuschents èn surtut Arpagaus u Pugaus (nua ch'ina chaplutta deditgada a S. Clau regorda a l'anteriur vitg en quel lieu sper l'anteriura via da communicaziun sursilvana sur il vitg actual), Casievi, Cantanaus, Plaunca e Strada.
La plaiv da Dardin è sa distatgada da la plaiv-mamma da Breil/Brigels l'onn 1664. Dapi radund 20 onns n'ha Dardin betg pli in'atgna scola.
La populaziun da Dardin lavura per gronda part en il sectur dal mastergn, dal servetsch e da l'agricultura.
[editar] Lieus spezials
- Grep Patnasa cun sias scaluttas preistoricas e la tavla commemorativa da ses perscrutader Cristianus Caminada
- Aua benedida: Tenor la legenda duai in missiunari (ev. S. Sigisbert tar sia arrivada en Surselva) avair pers l'orientaziun ed avair benedì il dutg en la Val Cuschina. Dapi cula aua benedida en il dutg
- Pe da Sontgaclau: Impronta d'in pe en in crap tranter Casievi e Pugaus sper l'anteriura via da communicaziun 'Via da Strada'
- Pugaus cun la caplutta da Sontgaclau, il davos bajetg existent d'in anteriur vitg che duai avair furmà la fracziun impurtanta da Dardin.
- Grep da Plaids: Grip da tuva en la spunda a nordvest da Dardin. Bellezza punct da survista.
- Plaun da Plaids: Davos il Grip da Plaids sa chatta ina pitschna planira che vegn cunfinada d'ina palì auta.
- Plaunca: Situà tranter Capeder e Schlans. Las restanzas da la davosa chasa da questa fracziun èn anc vesaivlas en quel lieu.
- Mulin: La chasa Mulin en la Val Cuschina. En quel lieu sa chattavan ina giada dus mulins.
[editar] Uniuns
- Uniun da giuventetgna
- Uniun da dunnas e mummas
- Arduna (uniun per la promoziun da la perscrutaziun istorica, linguistica e culturala)
- Chor mixt e chor baselgia
[editar] Colliaziuns
Artitgel «Dardin» en il Lexicon istoric retic
