Eveline Widmer-Schlumpf

Ord la Wikipedia

Midar tar: navigaziun, tschertga
Eveline Widmer-Schlumpf

Eveline Widmer-Schlumpf (*16 da mars 1956 a Favugn sper Cuira), è ina politicra svizra da la partida burgais-democratica (PBD). Dapi il 1. da schaner 2008 presidiescha ella sco commembra dal Cussegl federal svizzer il Departament federal da giustia e polizia (DFGP).

Cuntegn

[editar] Scolaziun, professiun e vita privata

Eveline Widmer-Schlumpf è la figlia da l’anteriur cusseglier federal Leon Schlumpf. Ella è creschida si a Favugn, nua ch’ella è era oz anc da chasa. Suenter avair frequentà il gimnasi a Cuira, (tip da maturitad B), studegia ella giurisprudenza a l’universitad da Turitg e fa ses licenziat l’onn 1981. Il 1983 suonda la patenta d’advocata grischuna, il 1986 la patenta notariala grischuna. L’onn 1990 fa ella il doctorat. Dal 1987 al 1998 lavura Widmer-Schlumpf sco advocata e notara.

Eveline Widmer-Schlumpf è maridada cun in inschigner da construcziun ed ha trais uffants. Ella è burgaisa da Favugn e Mönchaltdorf. Widmer-Schlumpf è in num d’allianza.

[editar] Carriera politica fin l’onn 2007

Il 1985 vegn Widmer-Schlumpf elegida en la dretgira cirquitala da Trin, la quala ella presidiescha dal 1991 fin il 1997. Dal 1994 al 1998 fa ella part dal Cussegl grond dal chantun Grischun. Ils 15 da mars 1998 vegn ella elegida sco emprima dunna en il cussegl guvernativ dal chantun Grischun. Lura vegn ella nominada sco presidenta dal Departament da finanzas e militar e surpiglia il 2001 ed il 2005 mintgamai il presidi guvernativ.

Il settember 2001 è ella daventada presidenta da la Conferenza dals directurs chantunals da finanzas[1]. En questa funcziun gioga ella l’onn 2004 ina ferma rolla, cura che indesch chantuns fan in referendum cunter il pachet fiscal da la Confederaziun [2]. Quai è stà l’emprim referendum da vart dals chantuns en tut l’istorgia da la Confederaziun ed ha gì per consequenza ch’il pachet fiscal è vegnì refusà dal pievel svizzer.

A partir dal matg 2004 fin la fin da l’onn 2007[3] fa Widmer-Schlumpf part dal cussegl da banca da la Banca naziunala svizra, a partir dal mars 2007 sco vicepresidenta[4].

[editar] Si’elecziun sco cussegliera federala

En las elecziuns dal Cussegl federal dal 2007 è dunna Widmer-Schlumpf vegnida elegida sco cussegliera federala empè da Christoph Blocher, il candidat uffizial da la Partida populara svizra (PPS) e cusseglier federal en uffizi. Quai a basa d‘ina cunvegna (publitgada curt avant l’elecziun) tranter la Partida socialdemocratica da la Svizra, Partida ecologica svizra e la Partida cristian-democrata svizra. Il pli absolut (necessari) da 122 vuschs ha ella cuntanschì en il segund scrutini ed è vegnida elegida cun 125 vuschs. Christoph Blocher ha obtegnì 115 vuschs[5]. Si'elecziun era ina surpraisa per blers observaturs da la politica. [6]

Gia avant l’elecziun avevan ils manaders da la fracziun da la PPS communitgà “d’excluder” da la fracziun mintga commember che acceptia la tscherna, senza esser vegnì nominà da la fracziun. Quai avess per consequenza ch’il commember na pudess ni far quint cun il sustegn da la fracziun ni participar als inscunters da la partida.[7] Widmer-Schlumpf ha giavischà temp da reflexiun d’in di per decider d’acceptar u da refusar si ’elecziun. Glindesdi en damaun, ils 13 december 2007, in di suenter l’elecziun accepta ella sia tscherna sco cussegliera federala avant l’Assamblea federala[8]. Ensemen cun il segund cusseglier federal da la PPS, Samuel Schmid, na vegn ella betg pli purtada da sia fracziun.

Cun dunna Widmer-Schlumpf fan per l’emprima giada trais dunnas part a medem temp dal cussegl federal. Ella è suenter Eugène Ruffy il segund commember dal Cussegl federal, dal qual il bab è gia stà cusseglier federal.

[editar] Critica ch’ella ha acceptà l’elecziun

Ils manaders da la fracziun da la PPS han reproschà Widmer-Schlumpf d’avair tradì si’atgna partida[9]. Ella ha declerà sin quai en diversas intervistas, ch’ella vuleva a l’entschatta refusar l’elecziun, ma per salvar il sez da la PPS haja ella midà idea[10]. Ina documentaziun da la televisiun svizra ha empruvà da mussar co ch’igl è vegnì a l’elecziun da la cussegliera federala[11]. Sa basond sin questa documentaziun, renfatscha la PPS a dunna Widmer-Schlumpf d’avair ditg manzegnas e d’avair intrigà cunter Christoph Blocher[12]. Eveline Widmer-Schlumpf ha refusà las inculpaziuns ed ha ditg ch’il film da la televisiun svizra mussia in fauss purtret[13].

[editar] Dumonda da sclauder ella da la partida

La PPS svizra ha discutà da sclauder Eveline Widmer-Schlumpf da la partida senza prender però ina decisiun formala. In’expertisa giuridica ha mussà che la PPS svizra na dastgia betg excluder ina persuna singula perquai che las secziuns chantunalas regleschian l’appartegnientscha a la PPS. La partida naziunala dastga be sclauder in’entira partida chantunala. La suprastanza centrala da la Partida populara svizra pretenda ils 4 d’avrigl 2008 che Widmer-Schlumpf sa retiria immediatamain dal Cussegl federal e ch’ella sortia fin ils 11 d’avrigl 2008 da la PPS. En cas che Widmer-Schlumpf na sortia betg, stoppia la PPS grischuna sclauder ella fin ils 30 d’avrigl 2008, cas cuntrari veglia la PPS svizra sclauder la partida chantunala dal Grischun[14] Widmer-Schlumpf sowie der Gesamtbundesrat lehnten die Forderungen ab [15]. Widmer-Schlumpf n’accepta betg las pretaisas da la PPS svizra. Tenor la cussegliera federala Micheline Calmy-Rey, sustegna l’entir Cussegl federal EvelineWidmer-Schlumpf. Ils 8 d’avrigl 2008 declera la direcziun da la PPS grischuna, ch’ella na sclaudia betg dunna Widmer-Schlumpf, quai ch’è vegnì confermà en ina votaziun consultativa cun 163 vuschs (ed intginas abstenziuns) en la radunanza da delegads dals 23 d’avrigl[16][17].

Ils 11 d’avrigl 2008 s’han participadas a Berna 12’000 persunas ad ina demonstraziun da simpatia per Eveline Widmer-Schlumpf, ina demonstraziun per dapli respect envers instituziuns politicas, ch’è vegnida lantschada da diversas associaziuns da dunnas manadas da l’Alliance F.[18]

Il prim da zercladur ha la suprastanza centrala da la PPS sclaus la PPS dal Grischun da la PPS Svizra. [19]

[editar] Referenzas

  1. ↑ Communicaziun da pressa da la conferenza dals directurs da finanzas dals 25 da schaner 2008
  2. ↑ La NZZ [1] ed il Tagesanzeiger [2] numnan ella "treibende Kraft" dal referendum dals chantuns, tenor il Blick ha ella "orchestrà" il referendum dals chantuns. [3].
  3. ↑ Rita Fuhrer è vegnida elegida en il cussegl da banca da la Banca naziunala svizra
  4. ↑ Midadas da persunal en il cussegl da banca da la Banca naziunala svizra (tudestg)
  5. ↑ Schweizer Parlament (editur): BR Christoph Blocher. (Stand: 13. Dezember 2007).
  6. ↑ Il "Bund" dals 13 da Dezember 2007: Perfin blers sanesters n'han betg cartì londervi (tudestg)
  7. ↑ Tenor il dretg dal parlament svizzer (Art. 61, Abs. 1)) n'è in'exclusiun betg pussaivla perquai che mo parlamentaris pon far part dad ina fracziun.
  8. ↑ search.ch (editur): Eveline Widmer-Schlumpf sagt Ja. (Stand: 13. Dezember 2007).
  9. ↑ taz.de (editur): Sie hats tatsächlich getan. 14. Dezember 2007 (Stand: 29. März 2008).
  10. ↑ NZZ Online dals 16 da december 2007 «Ich wollte den SVP-Sitz retten»
  11. ↑ Die Abwahl - Die Geheimoperation gegen Christoph Blocher, DOK da la Televisiun svizra dals 6 da mars 2008
  12. ↑ Pagina d'internet da la PPS, retschavì ils 15 da mars 2008
  13. ↑ NZZ Online (editur): Widmer-Schlumpf kontert Dokumentarfilm. 16. März 2008 (Stand: 29. März 2008).
  14. ↑ svp.ch: Zentralvorstand bestätigt Ausschlussantrag, Communicaziun da pressa da la PPS, retschavì ils 5 d'avril 2008
  15. ↑ Il cussegl federal collectiv sustegna Widmer-Schlumpf, Tages-Anzeiger, 3. April 2008.
  16. ↑ La PPS dal Grischun n'exclauda betg Widmer-Schlumpf, Kleine Zeitung, ils 10 d'avril 2008
  17. ↑ Kein Parteiausschluss von Widmer-Schlumpf, NZZ-Online, 23 d'avril 2008
  18. ↑ Widmer-Schlumpf bedankt sich vor 12'000 Personen, NZZ-Online, 11 d'avril 2008
  19. ↑ [4]


Predecessur(a)
Christoph Blocher		 Commember dal cussegl federal
2007-...		 Successur(a)
...


Svizra Commembers dal cussegl federal Svizra

Moritz Leuenberger · Pascal Couchepin · Samuel Schmid · Micheline Calmy-Rey · Hans-Rudolf Merz · Doris Leuthard · Eveline Widmer-Schlumpf
Da "http://rm.wikipedia.org/wiki/Eveline_Widmer-Schlumpf"
Utensils persunals