Lia Rumantscha
Ord la Wikipedia
| Quest artitgel è vegnì scrit d'in student da la lingua rumantscha e pudess cuntegnair sbagls d'ortografia e da grammatica. |
La Lia Rumantscha (LR) cun sedia a Cuira è l'organisaziun da tetg da las organisaziuns linguisticas e culturalas rumantschas promovidas dal stadi en il chantun Grischun. Ella è ina fundaziun tenor l'art. 62 ss. dal Cudesch civil svizzer (CCS). Ella vegn finanziada principalmain da subsidis dal Chantun e da la Confederaziun e s'enclegia sco instituziun d'util public ch'è neutral areguard la politica e la confessiun. Pervia da sia incarica da duvrar ils meds finanzials dal Chantun e da la Confederaziun per la promoziun da la lingua e cultura rumantscha, accumplescha ella in'incumbensa da dretg public.
Fundada en l'onn 1919, ha l'organisaziun fixada la finamira da mantegnair e sustegnair la lingua e cultura rumantscha. Quai pertutga domenas sco la scola, la baselgia, la vita publica sco era la famiglia. Ella offra en pli litteratura rumantscha, texts translatads ed è per exempel era post da consultaziun per curs en ils tschintg idioms rumantschs, vallader, puter, surmiran, sursilvan e sutsilvan sco era en la lingua da scrittira unifitgada Rumantsch Grischun.
La Lia Rumantscha era en pli responsabla per la translaziun da la suita da biro Microsoft Office en rumantsch.[1] Il pachet per midar la lingua da l'interfatscha (Language Interface Pack, LIP) per Office 2003 pon ins chargiar giu gratuitamain da la pagina d'internet da Microsoft (vesair sut colliaziuns). Actualmain lavura l'organisaziun ensemen cun Microsoft ed il Chantan Grischun a la localisaziun dad Office 2007 e dal sistem operativ Windows Vista, che vegnan a vegnir lantschads l'atun 2009.
Cuntegn |
[editar] Uniuns affiliadas da la Lia Rumantscha
- Uniun dals Grischs (UdG); Engiadina, Val Müstair, Bravuogn (fundada il 1904; www.udg.ch)
- Uniun Rumantscha Grischun Central (URGC) (fundada 2006)
- Surselva Romontscha (SR); fundada 2006
- Giuventetgna Rumantscha, GiuRu (fundada 1991). Editura da la gasetta giuvna «PUNTS»
- Uniun per la Litteratura Rumantscha (ULR)
- Cuminanza Rumantscha Radio e Televisiun (CRR)
- Societad Retorumantscha (SSR), la societad linguistica la pli veglia (fundada il 1885), purtadra da l'Institut dal «Dicziunari Rumantsch Grischun» a Cuira (www.drg.ch) ed editura dal dicziunari naziunal cun il medem num (DRG).
- Uniun da las Rumantschas e dals Rumantschs en la Bassa (URB). L'URB unescha las Rumantschas ed ils Rumantschs che vivan en la dispora (commembra da la LR dapi il 1991).
- Quarta Lingua (QL); societad da simpatisantas e simpatisants da la lingua e cultura rumantscha cun sedia a Turitg (fundada il 1972, commembra da la LR dapi il 2003; www.quartalingua.ch).
[editar] Anteriuras uniuns affiliadas
- Renania/regiuns protestantas da las Vals dal Rain Anteriur e Posteriur (fundada il 1922)
- Romania/regiuns catolicas da la Val dal Rain Anteriur (fundada il 1896)
- Uniun Rumantscha da Surmeir (URS)/Surses e Val d'Alvra (fundada il 1921; www.u-r-s.ch)
[editar] Vesair era
[editar] Funtaunas
- ↑ Informaziuns davart il project «Office Rumantsch», Lia Rumantscha
