Imperi osman

L'Imperi osman, era numnà in imperi tirc, era in imperi che dominava dal 14avel fin al cumenzament dal 20avel tschientaner ina gronda part da l'Europa dal Sidost, da l'Asia dal Vest e da l'Africa dal Nord. Tranter il 16avel e l'entschatta dal 18avel tschientaner controllava el era parts da l'Europa dal Sidost.

L'Imperi osman è naschì d'ina Beylica, in principadi ch'il manader da basa Osman I. aveva fundà enturn l'onn 1299 en il nordvest da l'Anatolia. Ses successurs han conquistà ina gronda part da l'Anatolia e s'expandì en il Balcan fin la mesadad dal 14avel tschientaner. Or dal pitschen principadi è sa sviluppà in imperi transcontinental. Ils Osmans han terminà l'imperi bizantin cun la conquista da Constantinopel l'onn 1453 tras Mehmed II. Cun la chapitala Constantinopel e la controlla d'ina part impurtanta dal spazi mediterran era l'imperi osmanic durant sis tschientaners il center da las interacziuns tranter il Proxim Orient e l'Europa. L'imperi regiva en blers pievels ed ha concedì a sias numerusas cuminanzas religiusas, ils millets, differents grads d'autonomia, per ch'els possian reglar lur agens affars tenor il dretg islamic. Sut il domini da Selim I e Süleyman dal pussant en il 16avel tschientaner è l'Imperi osman daventà ina pussanza mundiala.