Pressa rumantscha

Ord Wikipedia
Jump to navigation Jump to search

L'entschatta da la pressa rumantscha è da chattar en il 19avel tschientaner. Ina fluriziun da la pressa hai dà en il 19avel e 20avel tschientaner cun la redacziun da pliras gasettas e scrittiras. il Fögl Ladin (Engiadina/Val Müstair), la Gasetta Romontscha (Surselva) cumparevan l'onn 1996 duas giadas a l'emna, la Pagina da Surmeir (Surses/Val Alvra) e la Casa Paterna/La Punt (Sutselva/Surselva protestanta) cumparevan ina giada l'emna. Igl è era da menziunar ils differents chalenders annuals, annalas e revistas en lingua rumantscha.

L'onn 1992 è l'uniun Pro Svizra Rumantscha (PSR) vegnida fundada per la promoziun da la pressa rumantscha. Cun l'Agentura da Novitads Rumantscha (ANR), fundada l'onn 1996, è ina buna basa per la cuntinuaziun da la pressa rumantscha stada francada. Cun quest agid è La Quotidiana sa sviluppada. Cunquai che La Quotidiana integrescha las revistas da tuttas regiuns, promova la gasetta a l'avischinaziun dals idioms, da las valladas rumantschas e sustegn il svilup communabel. Quai che pertutga las regiuns regiunalas vegn scrit en il singul idiom; novitads surregiunalas vegnan publitgadas per rumantsch grischun.

Betg d'emblidar è Radio e Televisiun Rumantscha (RTR) che porscha a la Rumantschia in program infurmativ e divertent per rumantsch. Il Radio Rumantsch (RR) emetta in program dal di da la damaun (5.00 uras) enfin viaden en la notg (02.00 uras) e porscha in program multifar cun las spartas d'infurmaziuns, sport e divertiment. La Televisiun Rumantscha (TvR) preschenta l'emissiun d'infurmaziun Telesguard durant l'emna e l'emissiun da magazin Cuntrasts la dumengia. Ultra da quai emetta la TvR quatter giadas per onn l'emissiun Pled sin via, l'emissiun politica Controvers e per ils uffants mintga dumengia saira L'Istorgina.

Colliaziuns[modifitgar | modifitgar il code]