Tuorta Engiadinaisa
Quist artichel es scrit in rumauntsch puter |
La Tuorta Engiadinaisa es üna tuorta arduonda, sföglieda duos fin trais voutas cun pasta fruolla rasanida stiglia. Traunter quistas es ün' implida da crema da painch cun ün aroma da vaniglia. Perfecziuneda vain la spezialited cun üna glasura florentina, chi fo la Tuorta Engiadinaisa unica. Ella vela scu relasch culinaric svizzer. Nu's sto però confuonder cun la Tuorta da nuschs u cun la Tuorta Grischuna.
Tuorta Engiadinaisa
[modifitgar | modifitgar il code]Per quista vouta nu d'eiran que ils pastiziers grischunais, chi haun miss in vita quista spezialited dultscha engiadinaisa. La Tuorta Engiadinaisa es gnida creeda ils ans 1930 dad' Ostcar Kochendörfer. La famiglia Kochendörfer es immigreda da Wüttenberg (Germania) in Engiadina e gestiungia üna pastizaria e furnaria a Puntraschigna daspö l'an 1896.
Per la crema da la Tuorta Engiadinaisa as sbatta painch cun üna massa da mandla. Zieva as metta tiers vaniglia e kirsch. E per la glasura florentina as d'ho ün buogl a gramma, painch, zücher, meil e glucosa. Tar quista massa as metta tiers mandlas zipledas, minzas da la pinia, üjas passas, citrunat ed orandschonat. Quista massa as metta in üna fuorma arduanda, chi vain in fuorn per cuschir.
La surfatscha da la vart vain cuvrida cun crema, chi vain in seguit pudreda cun crocants. A la fin as metta üna schablona sülla glasura florentina, chi'd es però pü pitschna scu il diameter da la tuorta, chi vain finelmaing pudreda cun zücher fin.
Litteratura
[modifitgar | modifitgar il code]- Engadiner Torte. In: Patrimoine culinaire suisse. Consulte ils 3 avrigl 2026.