Ursina Giger
Quest artechel ei screts per sursilvan. |
Ursina Giger (* 6 d'uost 1985 a Mustér) ei ina cantadura, cumponista e musicista svizra.
Veta
[modifitgar | modifitgar il code]Ursina Giger ei gia duront siu temps da scola s'interessada per la musica ed ei vegnida instruida en cant classic e clavazin. Suenter la matura al gimnasi da Mustér eis ella ida a Turitg per far il cuors preliminar dalla Scola da jazz Turitg. Agl institut da jazz dalla scola aulta da Lucerna ha ella studegiau musica. Il 2009 ha ella fatg il Bachelor of Arts in Music cun cant el rom principal tier Susanne Abbuehl e Lauren Newton. Ella ha finiu siu studi cul master en pedagogia da musica il 2012.
Duront siu studi da master ha Ursina studegiau el program Erasmus+ in onn al Rytmisk Musikkonservatorium København (Danemarc) tier Hanne Boel e Django Bates. A Kopenhagen ha ella fatg musica cun musicists e musicistas da tut la Scandinavia e fundau cun tals la band Ursina’s Danish Laboratory che ha publicau il 2012 la EP «Lontan» cun tschun empremas atgnas cumposiziuns.
Ursina cumpona e scriva atgnas canzuns per romontsch ed engles. Siu project principal ei sia band URSINA che exista dapi 2012. Il 2013 ed il 2014 ein las empremas duas EPs cumparidas che Ursina ha cumponiu e produciu en atgna reschia. Ultra da quei ha la band gudignau il Swiss Live Talents National Language and Public Award. Igl onn 2015 ha Ursina survegniu la contribuziun per lavur culturala professiunala dil cantun Grischun per luvrar vid in niev album. Igl album «You Have My Heart» ch'ei cumparius il 2017 ei staus il resultat da quella contribuziun. Igl album ei vegnius registraus e producius a Berlin da Pola Roy, il battarist dalla band tudestga Wir sind Helden. Ina turnea da concerts ha menau URSINA atras la Svizra, la Tiaratudestga, l’Austria e la Hollanda. Il secund album «When I Let Go», producius en collaboraziun cun l’Irlandes David Odlum, ei cumparius il 2021. Per il giubileum da 10 onns dalla band URSINA ei la EP «Acoustic Variations» cumparida igl avrel 2022 - ina collecziun da canzuns existentas dad URSINA. Ils arranschaments per questa EP ein vegni reduci sapientivamein aschia che las novas versiuns acusticas per sediferenziar dallas versiuns gia registradas. Las registraziuns ein vegnidas fatgas per l’emprema gada egl agen local d'emprova en collaboraziun cun ils dus commembers Vojko Huter (ghitara) e Florian Egli (bass, registraziuns e mix).
Sper l’atgna band sefatschenta Ursina adina puspei cun canzuns popularas rumantschas che ein sias ragischs musicalas. Ensemen cun Corin Curschellas ed Astrid Alexandre elaborescha ella canzuns popularas per treis vuschs e representa ellas sco LA TRIADA. Las treis cantaduras han publicau il 2015 in album cul medem num, cun ina collecziun da 34 canzuns da tut la Romontschia. Il secund album «Chantinadas» ei cumparius el decuors digl onn 2022[1], denton buca sco portatun mobein sco abonnament digital da canzuns che accumpogna ils auditurs tematicamein atras igl onn e che porscha sper las registraziuns era notas, translaziuns ed ulteriuras informaziuns sur da mintga canzun populabara. LA TRIADA stat adina puspei sin tribuna ell’entira Svizra.
In niev project «Chanterlottas» ei naschius il 2024. Quel ha la finamira da render enconuschent a famiglias canzuns d’affons da tut ils idioms romontschs. Ursina viva cun sia famiglia a Turitg e discuora romontsch cun ses affons. Aschia eis ei vegniu adina pli cunscient ad ella ch’ei dat fetg bia bialas canzuns d’affons romontschas ch'ein denton idas en emblidonza. Ensemen cun siu partenari Florian Egli conta, suna e producescha ella registraziuns modernas da quellas canzuns existentas. Il 2026 ei cumparius in abonnament da canzuns cun 24 canzuns.
La canzun «Miu cor» digl album «When I Let Go» ei l’emprema canzun romontscha sin Netflix. Ella ei vegnida duvrada il 2022 en l’emprema episoda dalla secunda stafla dalla seria Warrior Nun en ina scena che gioga en ina bar svizra.[2]
Honurs e premis
[modifitgar | modifitgar il code]Discografia (URSINA)
[modifitgar | modifitgar il code]- 2012 Ursina’s Danish Laboratory – Lontan EP
- 2013 URSINA – Time Is A Thief EP
- 2014 URSINA – Hiding Behind A Mask EP
- 2017 URSINA – You Have My Heart (Radicalis Music)
- 2021 URSINA – When I Let Go (Radicalis Music)
- 2022 URSINA – Acoustic Variations
Discografia (ulteriurs projects cun artists differents)
[modifitgar | modifitgar il code]- 2012 Quintinò – Sco Alas
- 2014 Stimmorchester – Room (Unit Records)
- 2015 La Triada – La Triada (r-tunes)
- 2019 Pascal Gamboni – Everybody Wants The Honey (r-tunes)
- 2021 Martin Bezzola – Il lung viadi
- 2022 La Triada – Chantinadas (r-tunes)
- 2025 Trummer - Ir Brandig (Tourbomusic)
- 2026 Chanterlottas (abonnament da canzuns)
Colligiaziuns
[modifitgar | modifitgar il code]
Annotaziuns
[modifitgar | modifitgar il code]- ↑ LA TRIADA: 12 mais – 24 chanzuns – 3 vuschs, consultau ils 22 da fevrer 2026.
- ↑ L' emprema canzun romontscha sin Netflix: «Miu cor» dad URSINA, consultau ils 22 da fevrer 2026.
- ↑ Sustegn e communicaziun da cultura dil cantun e dil marcau Lucerna, consultau ils 22 da fevrer 2026.
- ↑ Swiss Live Talents 2013, consultau ils 22 da fevrer 2026.
- ↑ Cantun Grischun, consultau ils 22 da fevrer 2026.