Utilisader:Andreas/Plazzals/Societad svizra d'esperanto
La Societad svizra d'esperanto (esperanto: Svisa Esperanto-Societo (SES), tudestg: Schweizerische Esperanto-Gesellschaft, franzos: Société suisse d'espéranto, talian: Società esperantista svizzera) è vegnida fundada l'onn 1905 en la Svizra romanda ed è cun quai ina da las pli veglas associaziuns esperantistas dal mund. En il decurs da sia istorgia aveva la societad bleras commembers prominents sco il filosof genevrin Ernest Naville, il scienzià Auguste Forel, il schurnalist, diplomat e secretari da Gandhi Edmond Privat, il fundatur da l'Associaziun Universala d'Esperanto Hector Hodler (figl dal pictur turitgais Ferdinand Hodler) ed il fundatur da la Banca WIR Paul Enz.
Oz ha la Societad svizra d'esperanto sia sedia en la biblioteca municipala da La Chaux-de-Fonds en il CDELI che cuntegna tranter auter era la biblioteca da la societad.
Gruppas ed uniuns localas[modifitgar | modifitgar il code]
La Societad svizra d'esperanto è la federaziun tetgala dal moviment d'espranto en Svizra. Oz datti uniuns localas activas a Basilea (Esperanto-Gesellschaft Basel), Berna, Wil SG, Genevra (Esperanto-Grupo „La Stelo“), Losanna (Laŭzana Esperanto-Societo) e Turitg (Esperanto-Societo Zürich). Sper las gruppas localas ha la societad era ina gruppa da giuvenils (Junges Esperanto Schweiz, JES). Ultra da quai datti en Svizra gruppas localas dad associaziuns professiunalas d'esperanto. Tranter ellas èn la societad d'esperanto dal persunal da viafier, l'uniun dals esperantists tschorvs, la lia catolica d'esperanto ed autras.
Relaziuns internaziunalas[modifitgar | modifitgar il code]
La Societad svizra d'esperanto mantegna contacts cun las societads naziunalas d'esperanto en las pajais vischins Frantscha, Italia, Austria e Germania (Deutscher Esperanto-Bund). Ella è (1934-38 e puspè dal 1947) l'uniun naziunala da l'Associaziun Universala d'Esperanto ch'aveva dal 1908 fin il 1936 sia sedia a Genevra e per in curt temp (1919/20) a Berna.
Sis giadas ha il congress universal d'esperanto gì lieu en Svizra: 1906 a Genevra, 1913 a Berna, 1935 danovamain a Genevra, 1939 e 1947 anc duas giadas a Berna e finalmain l'ultima giada l'onn 1979 a Lucerna. Il congress dal 1939 è stà l'ultim davant la Segunda Guerra mundiala però l'onn 1947, suenter la guerra, ha il moviment celebrà sia renaschientscha.