Utilisader:D.Camenisch/Cudeschs/Europa dal Nord/Introducziun
L'Europa dal Nord è enconuschenta sco destinaziun turistica segnada d'ina natira intacta e da cuntradas infinitas. Ed ils pajais da l'Europa dal Nord tutgan tar ils pli sviluppads insumma e valan sco exemplarics sin il sectur da l'assistenza sociala.
Quests aspects e blers auters vegnan preschentads qua en duas parts:
- En la part introductiva dal cudesch vegn l'emprim dà in sguard al term ‹Scandinavia› cun tut sias implicaziuns geograficas, istoricas e culturalas. Alura suonda l'artitgel da Vichipedia davart ils Vikings. Quel s'orientescha consequentamain al studi da las funtaunas e lubescha uschia in sguard differenzià sin quest pievel legendar che furma savens ina da las emprimas associaziuns en connex cun ils pajais dal nord.
- En la segunda part dal cudesch suondan ils singuls purtrets dals tschintg stadis da l'Europa dal Nord, e quai en successiun vest-ost: Islanda, Danemarc, Norvegia, Svezia e Finlanda. In chapitel final cumpiglia chartas topograficas che preschentan la geografia ed ils lieus principals dals differents pajais.
La versiun preschenta dal cudesch è vegnida preparada per la stampa il zercladur 2016. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs. Il tom ‹Europa dal Nord› fa part d'ina retscha da cudeschs che preschenta ils singuls stadis da l'Europa (geografia, istorgia, politica e cultura).