Utilisader:Remoulade~rmwiki
Capricorn Remix è ina concurrenza lantschada il 2007 da Grischun Vacanzas. L’idea extraordinaria da quel era da permetter per l’emprima giada a mintgin da sincronisar online in spot da televisiun actual. L’acziun fa part dad «Enavant Grischun», ina campagna da communicaziun offensiva da plirs onns organisada en il rom da la marca regiunala «graubünden». En tut è il spot vegnì sincronisà var 100 giadas. Ils victurs da la concurrenza han survegnì differents premis da la regiun Grischun. Il premi principal da la concurrenza, che ha durà dals 31-10-2007 fin ils 31-3-2008, ha gudagnà Adrian Candinas da Sumvitg cun ses remix «Herzlich Willkomma». El ha pudì giudair ina fin d’emna da wellness luxuriusa a Scuol en l’Engiadina Bassa.
In connex cun il rumantsch
[modifitgar | modifitgar il code]En il spot da televisiun «La pli bella cuntrada da la Svizra» converseschan dus capricorns animads dal computer in cun l’auter. In dals dus capricorns discurra rumantsch, l’auter translatescha en tudestg il text. Il capricorn che discurra rumantsch raquinta tut intgantà dal bel chantun Grischun. Sia laudatio tuna suandantamain:
„Neus vain tochen oz ina natoira intacta.“
Il capricorn giuven cumenza a translatar: „Also, er sait, mir hend bis hüt en sehr en intakti Natur.“
Il vegl cuntinuescha stoicamain:
„Neus vain bler sulegl. Sobra aria. Igl unvierm blera naiv.
Il capricorn giuven cuntinuescha:
„Viel Sunne, suuberi Luft, und ...“
El fa ina pausa e dumonda il capricorn vegl:
„... und im Winter vill Schnee hesch no gsaid, oder?“
Quel di da gea e cuntinuescha:
„In aschen lungatsch vainsa neus, ina aschna cuschoina ed ina aschna voa da fier. Geu crai betg da surfar, scha geu schin, tg’il canteun Grischeun é oina dallas pi bealas cuntradas dil mond.“
Il capricorn giuven para da perder il fil, entant ch’il vegl s’entusiasmescha pli e pli fitg per il Grischun. Lura interrumpa quel andetgamain sia laudatio. Il giuven piglia tema e sbarbutta dabot:
„Also, ähhh... also er said, es ähhh... isch eifach uhuere schön do d’obe.“
Il spot è vegnì emess il november 2007 en ils programs dal Schweizer Fernsehen e sin Tele Züri.
La pagina Web dal Capricorn Remix
[modifitgar | modifitgar il code]La pagina Web ha gudagnà la medaglia d’aur en l’Award «Best of swiss web» en la categoria «Online & Mobile Campaigns» ed è medemamain stada la victura dal premi Schweizer Dialogmarkteting en la categoria Medias electronicas.