Viamala (u Via Mala) è il num d’in toc da la via che maina lung il Rain Posteriur tranter Tusaun e Ziràn-Reschen. La chavorgia profunda furma in dals gronds impediments sin la ‹Via sut› da Cuira en direcziun dal Pass dal Spleia e dal Pass dal San Bernardin ch’era pli baud fermamain discreditada.
Tenor perscrutaziuns cumprovadas fatgas d’Armon Planta manava ina via gia durant il temp dals Romans tras la Viamala. Schebain igl era pussaivel da duvrar la via cun in vehichel n’è betg cler. Dissegns sin crap a Carschenna laschan ultra da quai supponer ch’ina senda da sauma sur las Alps manava gia da lez temp (ca. 1500 a.C.) atras questa regiun.
Nà dal nord devi dus access a la chavorgia: da la vart sanestra da Masagn sur Runtgaglia u da la vart dretga da Seglias sur il chastè da Munt Son Gion (Reziòlta) e la baselgia da Son Albin. La segunda varianta era pli frequentada durant il temp dals Romans; enturn l’onn 1300 n’era ella dentant betg pli transibla per motivs da bovas. Omaduas vias vegnan ensemen sin il Nesselboden, l’entrada dal nord da la Viamala. Quella avevan ils Romans superà cun pitgar pliras mesas galarias or da la grippa. Ina punt da lain ch’era probablamain situada là nua che la punt d’autostrada sa chatta oz, manava il traffic puspè sin la vart dretga dal Rain, sur Reschen vi Ziràn.
