Ils Fantoms da Firenza

Questa pagina è scritta en sursilvan.

Ils Fantoms da Firenza ei ina ovra da Rico Tambornino

Resumaziun

La historia entscheiva cun in autur svizzer che fa in cuors agl Instituto Europeo a Firenza. Suenter la sera finala cun ina buna tscheina sesanfla el sil viadi a casa tras las streiglas stgiras da Firenza. Cheu auda el tuttenina puspei pass davos el. Il fantom che ha gia persequitau el inagada peglia el e meina el tras tschalers. El setschenta en ina reunida da filosofs trapassai. Muort gronda enguoscha scappa el. L’auter gi, cu el sesanfla el tren viers casa, legia el che il sacrofag cun la bara da siu rapinader seigi vegnius anflaus. Suenter igl emprem capetel che gioga el present, pren il cudisch in sguard anavos ella historia da Firenza. Ei vegn rapportau tgei che il cunfar dil pader dominican Girolamo Savonarola ha effectuau. Il salvament dall’olma digl artista Sandro Filipepi ei ina principala missiun da Savonarola. Ella casa dils deletgs dalla signora Scuzzi-Conchiglia, pretenda il pader plaid e fatg digl artist. Il pader propona a Filipepi da luvrar per il convent, sco el haveva viu ei en siu siemi. Igl artist che drova lavur selai en sin il pader dominican, tgei che munta tenor Savonarola il salit dall’olma per igl artist. Il regl carnal ei per il pader il pli grond malfatg. Per menar Filipepi silla dretga via muossa el ad el il Conte Pico della Mirandola, in um da gronda savida, che va a frusta perviada in'amur per ina dunna maridada. Filipepi sa luvrar el convent el studio digl munch-artist Guido di Pietro numnaus Angelo, in renomau artist che ha emballiu las cellas dil convent cun frescos d’ina grondiusa sempladad. Il gi che Carli ils otg, ei arrivaus a Firenza ha finalmein la revoluziun, spitgada aschi ves da Savonarola, entschiet. La noblezia, cunzun ils Medicis, ein vegni scatschai. Tut il luxus ei vegnius barschaus, ei entscheiva in niev temps sut la bitgetta da Savonarola. La revoluziun vegn era mussada dad ina autra vart. Numnadamein dalla vart dad in um ch'ei buca cristians, Don Silva Ugone Budelli, numnaus pirat. Igl ei in temps malsegir. Persunas innocentas vegnan condemnadas alla mort e persunas en cuttas da launa caura regian ussa las vias a Firenza. Il quatier dils deletgs ei vegnius devastaus, e cun lez era la fatschenta da jarvas dil hermer Budelli. Suenter duas jamnas en perschun, vegn Budelli finalmein interrogaus. El ei innocents, denton interessescha quei nuot il derschader Montegazza. Lez vesa malfatgs nua ch’igl ei schabegiau nuot ed ei cuntentaus mo sch’el auda il grem dils torturai. Montegazza ei denton buca pli segirs da sia lavur. El anfla negina sien pli dapi ch’el ha arrestau Budelli. Siemis nauschs persequiteschan e tussageschan ses siemis. Suenter ina febra tuorna el alla lavur e deliberescha sis perschuniers che sesanflavan da quei temps en perschun. El ei vegnius pertscharts da quei ch’el haigi gia sentenziau 177 persunas alla mort e leva buca che aunc daplirs mondien sin siu cuost. In dils deliberai ei Budelli. Ils temps ein malruasseivels e Savonarola cala buca si cun sia idea d’in segund Gerusalem a Firenza. La finala vegn el fiers en perschun, vegn interrogaus sco Budelli da siu temps, e la finala condemnaus alla mort. Il pader dominican ei vegnius pendius vid la fuortga e suenter aunc barschaus. La finiziun dil cudisch gioga puspei el present. Igl autur svizzer ei turnaus a Firenza per mirar il sacrofag dil Pico della Mirandola. Deplorablamein eis ei buca pusseivel da gir sche il tgierp che schischieva el sacrofag duront la scoperta seigie e veramein quel dil Pico.

Las persunas principalas

El cudisch "Ils fantoms da Firenza" giogan ina massa persunas. Denton biaras ein buca da relevanza per il raquent. Perquei vaiel sedecidiu da caracterisar suletamein las tschun persunas principalas ord mia vesta.

Girolamo Savonarola

El ei il prior dil convent dominican da San Marco. El ei descendent d'ina famiglia beinstonta, filosof, predicatur e posseda in inschign diplomatic. Siu siemi ei da scatschar ils Medicis da Firenza e far ord Firenza in segunda Gerusalem. En in da ses siemis da Diu ha el viu ch'el ha da salvar Filipepi. Quei ei lu era il motiv ch'el serenda ella casa dils deletgs dalla signora Scuzzi-Conchiglia per menar el anavos silla dertga via. Filipepi duess luvrar per il convent. Sia vusch da glatsch fa temer ils inimitgs, el ha in nas sprer, el vegn numnaus igl aunghel dall'apocaliptica. Ils 23.5.1498 eis el vegnius pendius vid la fuortga e suenter ars.

Sandro Filipepi

Artist fetg talentau. Ha denton negin lavur, la cassa ei vita ed el va dad in discletg a l'auter. Auter che Savonarola gauda el il regl carnal, tgei ch'ei tenor il pader in malfatg. El ei malsauns, vesa derschalets e dierma strusch pli. Ha inflammaziuns dalla beglia e dil buttatsch, crappa els narunchels ed ina concentraziun da flads diabolics el venter. Pren encunter lavur che Savonarola porscha ad el, pren dimora el convent e sa luvrar egl atelier dil muntg-artist Angelo. Spera da saver cumbinar sia lauvr el convent cun ina dieta e cura da tes.

Conte Giovanni Pico della Mirandola

Naschius igl onn 1463. Cun 14 onns ha el entschiet siu studi da giurisprudenza all'universitad Bologna. Pli tard ha el aunc studegiau matematica, filosofia, filologia e teologia. Cun 23 onns ha el organisau in colloqui cun 900 scienziai da renum europeic. El ei staus in dils bials giuvens da siu temps e rihezia. Sia gronda amur ei ina dunna pli passada, ch'el ha schau rapinar. El ei setschentaus en perschun, pervia da quei rapin ch'ei ius ora sanguinus, da nua ch'el ei vegnius deliberaus da Lorenzo Medici. Suenter siu relasch dalla perschun eis el daventaus pader dominican a San Marco. Cun siu scheni vess el saviu far carriera sil sectur politic, il sulet incaps ei la dunna passada, sia amur, sia pissiun. El ha ina olma vulnerabla. Mintga notg vesa el treis derschalets, per mitschar da quels va el a paterlar cun ina Venus da marmla ch'ei la personificaziun da sia amur nuncontonschibla. El ei morts ils 17.11.1494 cun 31 onns. Onns pli tard eis el apparius al raquintader sco fantom ella notg.

Don Silva Ugone Budelli

Hermer da spezarias, posseda fatschenta ella casa dalla signora Scuzzi-Conchiglia. El habitescha el quatier da San Niccolò, nua ch'el ha in appartament cun ina atmosfera tut speziala. El ei rihezia, ha cavels ners, liungs e neidis sco ieli d'uliva, levzas carnal sensitivas, pial da bronz ed egls pli blaus che la mar. El ei in um galant ed in muronz excellent, da tgei che certas signoras fan bugen diever. El vegn senteziaus per malfatgs ch'el ha buca fatg, denton vegn el strusch torturaus.

Vincenzo Montegazza

Vicederschader che daventa primderschader suenter che il primderschader ei vegnius tussegaus. El interroghescha Budelli ed inculpescha lez da malfatgs ch'el ha buca comess. El ei da colur mellna cun egls mellens. Sia consorta ei freida sc'in pèsch. El vegn murdergiaus notg per notg da darschalets e nauschaspèrts. En sia carriera ha el sentenziau 177 persunas alla morta, las davosas sis persunas che fussen sin sia gliesta deliberescha el. Denter quels sesanfla era Budelli. Morts eis el dalla nova pestilenza all'entschatta digl onn 1498.