AV Fryburgia
|
Questa pagina è scritta en puter. |
| Vappa | Monogram | ||||
|---|---|---|---|---|---|
|
| ||||
| Datas da basa | |||||
| Universited: | Universited da Friburg | ||||
| Fundaziun: | 1918 | ||||
| Federaziun: | Societed da Students Svizzers (SSS) | ||||
| Scurznida: | FR! | ||||
| Motto: | «Treu, ehrlich und stolz!» (T.e.u.s.!) | ||||
| Culurs da societed: |
| ||||
| Sex: | Viril | ||||
| Commembers: | Activitas: 25 Veterans: 300 | ||||
| Mensura: | Confraternited chi nu's duellescha | ||||
| Pagina d'internet: | www.fryburgia.ch | ||||
L'AV («Akademische Verbindung») Fryburgia es üna corporaziun da students universitaria ed üna secziun da la Societed da Students Svizzers a l'Universited da Friburg. Students masculins da tuot las faculteds paun dvanter commembers da l'uniun.
Istorgia
[modifitgar | modifitgar il code]Düraunt il cumanzamaint da l'ulitm tschientiner pretendaiva la vita illa societed da students adüna dapü participaziun dals commembers. Numerusas festas, comers, banchets, bals e ceremoniels tradiziunels nun influenzaivan be la situaziun finanziela dals students ma periclitaivan bain eir il stüdi. Quista situaziun ho fat nascher oposiziun interna tar l'AKV Alemannia, chi deira da quel temp l'unica societed da students friburgaisa dal «Schweizerischer Studentenverein» (Rumauntsch: Societed da Students Svizzers) cun rischs uriundamaing illa Svizra tudas-cha. Las prescripziuns restrictivas e reglas rigidas mettaivan in prievel da reüssir cul stüdi in düreda radschunaivla. Vitiers gniva cha la commembranza in societeds da students d'eira vi e pü cunfrunteda cun discredit causa la noscha reputaziun cha quistas vaivan tar bgers.
Scu consequenza es seguida l'an 1918 üna separaziun. Parts da l'Alemannia s'haun furmedas danövamaing e fundo l'AV Fryburgia. Böt centrel da la societed giuvna d'eira da der darcho dapü priorited al stüdi universiter. Scu consequenza es gnida sminuida l'obligaziun da preschentscha ed eir l'obligaziun da baiver, cuntschainta scu «Trinkzwang», es gnida abolida. Mantgnieu es per granda part il «Komment» chi cuntegna ordinaziuns tradiziunelas davart il cumportamaint düraunt banchets. Cun la separaziun vaiva la refurmaziun dad uniuns da students (aint il sen tradiziunalistic e na religius) cuntanschieu Friburg. L'AV Fryburgia d'eira zieva l'AV Berchtoldia (Berna) pür la zeguonda uniun da la Societed da Students Svizzers (SSS) refurmeda. Seguidas sun pü tard l'AV Froburger (Basilea) e l'AV Welfen (Turich). L'ultima es gnida fundeda suot participaziun considerabla da commembers da la Fryburgia.
Fin ils ans 1970 tuochaiva l'AV Fryburgia tar las societeds da students las pü grandas e dominantas a Friburg. Bè düraunt ils ans da guerra d'eira la vita d'uniun limiteda cun que cha bgers commembers as chattaivan in servezzan activ. L'an 1937 es sortida da l'AV Fryburgia, chi ho la funcziun da societed materna, l'AV Staufer. Oter cu tar la spartiziun da l'AKV Alemania bundant 20 ans pü bod, es quista separaziun gieu lö in möd paschaivel e las duos societeds as chattaivan eir inavaunt in relaziun amicabla. Il listess vela eir per la relaziun cun la CA Rezia chi es naschida düraunt l'an 1957 our da la fracziun grischunaisa da l'AV Fryburgia.
Daspö il muvimaint dal 68' sun societeds da students eir aviertas per duonnas. Decisiv per quist pass d'eira üna nouva refuorma generela al livel naziunel. Que düraunt il mandat dal president centrel Altermatt v/o Solo, hoz professer emerito da la faculted filosofica ed anteriur rectur da l'universited da Friburg chi es commember veteran («Altherr») da l'AV Fryburgia. Oter cu las uniuns affiliedas s'ho la Fryburgia però decissa da quel temp da mantegner il status quo ed es fin hoz l'unica confraternited exclusivamaing masculina traunter las societeds da refuorma a Friburg. In cited es ella cun que eir l'unica societed studentica dad hommens chi nun appartegna a l'uschedit «Block» (tudas-ch: «Bund akademischer Kommentverbindungen»), chi sun pü conservativas e chüran rituels pü tradiziunels.
Schabain cha'l muvimaint dal 68' ho purto l'avertüra per duonnas s'haun las ciffras da commembers sminuidas tar las societeds da students. Da quist fat es eir l'AV Fryburgia pertucheda. Traunteraint ho que do augmaints d'entredas considerabels, la ciffra da commembers s'ho hoz però stabiliseda sün nivel pü bass.[1]
Eir auncha hoz manifestescha la societed studentica minchataunt caracter da resistenza e refuorma cun as defender cunter il curraint pü conservativ da la societed naziunela. Düraunt il semester d'utuon 2010 ho la Fryburgia refüso üna communicaziun dal cussagl studentic da las societeds da students, chi d'eira cunter l'iniziativa da stipendis lanceda, e sustgnieu l'agir dals iniziants.[2]
Principis da basa
[modifitgar | modifitgar il code]Parola e vappa
[modifitgar | modifitgar il code]Parola
[modifitgar | modifitgar il code]La parola da l'AV Fryburgia es «Treu, ehrlich und stolz!» (scurznida: T.e.u.s.!) e declera las valurs, tenor quellas ils commembers dessan viver. Il clam da cumbat es «Sonne, ringe Dich durch!», que es l'ultima lingia da la strofa da «couleur», chi dess significher l'optimissem ed il plaschair da viver.
Vappa
[modifitgar | modifitgar il code]La vappa da la societed exista ourd tschinch parts. Davous la culur ed il monogram da la Fryburgia sun visiblas illa part sura las culurs da la Societed da Stundents Svizzers (cotschen-alv-verd), la crusch svizra ed il sulagl (clam da cumbat). Suotvart sun posiziunedas il vegl emblem da l'universited e la vappa da la cited da Friburg.
Principis da basa
[modifitgar | modifitgar il code]L'AV Fryburgia es üna societed studentica da refuorma. Schabain ch'ella ho ün comment chi vain chüro aunch'hoz, nu cugnuoscha ella üngün sforz da baiver. Las activiteds da l'uniun dessan gnir practichedas in möd radschunaivel. il center da da la vita societaria es il banchet eivnil, chi es obligatoric per commembers activs. A vain miss paisa sün üna svelta finischiun dals stüdis e success tals examens. Impü vegnan ils commembers animos da piglier part ad activiteds sportivas chi vegnan eir offridas da la societed.
La societed es purtedra da culurs e cunter la mensura, chi vain vissa scu relict nuncristiaun da la tradiziun duellanta. L'AV Fryburgia es dal rest eir cunter üsits da möd pompus chi vegnan chüredas da las societeds studenticas dal «Block», scu p. ex. paradas a chavagl. La chapütscha orandscha vain purteda in fuorma simpla e modesta ed eir sainza surcusidas.
Strofa da «couleur»
[modifitgar | modifitgar il code]La strofa da «culeur» es ün regal dad Abbé Joseph Bovet ed üna da las unicas cun ün'egna melodia - voul dir sainza melodia d'üna chanzun fingià existenta.
- De clair soleil, la tête auréolée
- au fond du coeur la flamme du devoir
- chantons leurs airs, en joyeuse envolée
- dans ses murs gris, Fribourg aime a les voir:
- Fryburgia, Fryburgia, c'est toi, c'est ta cohorte
- preux troubadours, servants de l'idéal
- dont la devise, impérative et forte
- s'en va quérir l'astre à l'éclat royal!
- Sonne, Sonne, ringe Dich durch!
- Sonne, Sonne, ringe Dich durch!
Tschüvel da «couleur»
[modifitgar | modifitgar il code]Il tschüvel da «couleur» es il segn distinctiv traunter ils commembers. El exista our da quatter tuns da la chanzun studentica «Dort wo der Rhein».
Commembers cuntschaints (schelta)
[modifitgar | modifitgar il code]- Urs Altermatt (*1942), professer d'istorgia generela e contemporana a l'Universited da Friburg
- Marc Amstutz (*1962), professer per dret d'economia a l'Universited da Friburg
- Daniel Anrig, president dal tribunel chantunel dal Chantun Glarus
- Mario Cavigelli (*1965), cussglier guvernativ (PCD) dal Chantun Grischun
- Kurt Furgler (*1924, †2008), anteriur cussglier federel (PCD) e president da la Confederaziun
- Hans Hürlimann (*1918, †1994), anteriur cussglier federel (PCD) e president da la Confederaziun
- Marcel Niggli (*1960), dekan da la faculted giuridica da l'Universited da Friburg e professer per dret penel e filosofia dal dret
- Johannes Baptist Rösler (*1922, †2009), politiker tudas-ch (CDU)
- Hubert Stöckli (*1966), professer per dret civil e cummerziel a l'Universited da Friburg
Paginas d'internet
[modifitgar | modifitgar il code]Indicaziuns
[modifitgar | modifitgar il code]- ↑ Fryburgia 1918-1993, Duss Niklaus (Hrsg.), Freiburg i.Ue. 1993.
- ↑ https://web.archive.org/web/20110903114220/http://www.stipendieninitiative.ch/drupal/content/partnerorganisationen