Audrey Hepburn

Questa pagina è scritta en sursilvan.

Audrey Hepburn ( *4 da Matg 1929 ad Ixelles/ Elsene, Belgia; + 20 da Schaner 1993 a Tolochenaz, Svizra; atgnamein Audrey Kathleen Hepburn-Ruston) era ina actura da derivonza engles-hollandesa e valeva els onns 1950 e 1960 tier ils impurtonts stars feminins. Per sias prestanziuns artisticas eis' ella vegnida premada denter auter cun igl Oscar, treis Golden Globes, in Emmy, dus Tony Awards ed il Grammy. Els onns pli tards da sia veta ha ella sededicau oravontut a sia lavur sco ambassadura extraordinaria per UNICEF.

La veta els onns 1929 -1952

Hepburn ei naschida 1929 sco Audrey Kathleen Ruston, feglia dil bancier engles beinstont Joseph Victor Anthony Ruston (1889 - 1980) e sia dunna hollandesa Ella Baroness van Heemstra (1900 - 1984) ella Belgia ed ha obteniu la naziunalitad englesa. (1) Il num da famiglia ei per pli tard vegnius midaus en Hepburn-Ruston, suenter ch' il bab da Audrey ha anflau il num Hepburn sin documents da ses antenats. (2) Hepburn haveva dus miez frars, Jonkheer Arnoud Robert Alexander Quarles van Ufford (1920 - 1979) ed Jonkheer Ian Edgar Bruce Quarles van Ufford (*1924) orda l' emprema letg da sia mumma cun il nobel hollandes Jonkheer Hendrik Gustaaf Adolf Quarles van Ufford. (3) Cura ch' ella era sis jamnas ha ella survegniu talmein ferm tuoss tgaun, che la respiraziun ha calau si ed ella ha stuiu vegnir reanimada. Referiu a quei eveniment ha Hepburn detg pli tard: " Sche jeu scrivess ina biografia, entschavess jeu suandontamein: Jeu sun naschida a Brüssel, Belgia ils 4 da Matg 1929...e sun morta sis jamnas pli tard." (4) Il bab ha bandunau la famiglia, cura che Audrey haveva sis onns (5) (6), ed ella ha piars mintga contact cun el. Per dus decennis pli tard eis ei vegniu tier ina revesida denter bab e feglia. Quei cun sustegn dalla Crusch Cotschna. Malgrad dalla relaziun emoziunalmein distanziada tier siu bab ha ella susteniu finanzialmein siu bab tochen tier sia mort. (7) Naven da 1935 tochen 1938 ha Hepburn visitau ina scola da mattatschas a Kent, Engeltiara. Cura che la 2. Uiara Mundiala ei rutta ora, ha ella midau casa cun sia mumma e ses dus miez frars tier siu tat ad Arnheim en la Hollandia, nua ch' ella ha viu el Matg 1940 l' occupaziun tudestga che haveva entschiet. (8) Per mascar las ragischs britannicas da sia feglia ha la mumma midau siu num en Audrey Edda. Ella ha era smess il num dil bab e haveva num da quei temps Edda van Heemstra. (9)

Fontaunas

Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 16
Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 15
Baroness Ella Van Heemstra Geni.com, abgerufen am 15. Juli 2011
Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 29
Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 13
Walker, Alexander: Audrey: Her Real Story. Weidenfeld & Nicholson, 1994, ISBN 978-1857973525.
Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 34-36
Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 30
Sean Hepburn Ferrer: Audrey Hepburn – Melancholie und Grazie, 6. Auflage, Henschel Verlag 2007, S. 40

Colliaziuns

Commons: Audrey Hepburn – Collecziun da maletgs, videos e datotecas d'audio