Chanzun da la sontga Margriata
Ina da las chanzuns rum. las pli veglias ed interessantas, databla il pli baud vers la fin dal 15. tschientaner. La s. Margriata, martira legendara torturada e stgavazzada l'onn 275 ad Antiochia en Pisidia (oz ruinas ad Yalvaç en Turchia), n'è istoricamain betg cumprovabla. Ses cult è vegnì promovì da la claustra da Faveras en il 14. e 15. tschientaner. La «Canzun de Sontgia Margriatha» raquinta en 80 vers senza rima e da diversa lunghezza la legenda da l'Alp Cunclas che sa transfurma en in desert suenter che la dunschella M., ch'è stada 7 stads main 15 dis ad alp sco zezen, vestgida dad um, vegn scuverta sco dunna dal paster pitschen che tradescha il misteri al signun, malgrà pliras empermischuns carmalantas. Ballada alpestra d'origin pajaun, è la chanzun vegnida transfurmada pliras giadas durant ils tschientaners. En il cas da la figura feminina M. sa tracti evidentamain d'ina dunna selvadia da la cardientscha populara che regala fritgaivlezza, ma che sa vinditgescha era per esser vegnida tradida, ina diala colliada narrativamain cun la s. Margriata cristiana. L'interess da domaduas figuras miticas è il bainstar dals pasters e da la muaglia. Enturn la veglia melodia da la C., enconuschenta tras ina registraziun realisada cun Catarina Gartmann-Casanova a Pruastg il 1931, ha Gion Antoni Derungs cumponì sia «Sontga Margriata». La C. vala sco juvel da la litteratura orala rumantscha.
