Dario Cologna

Ord Wikipedia
Jump to navigation Jump to search
20180128 FIS NC WC Seefeld Dario Cologna 850 2445.jpg

Dario Alonzo Cologna è in passlunghist Svizzer dal Grischun.

Success[modifitgar | modifitgar il code]

Dario Cologna ha sco emprim Svizzer gudagnà il classament general da la cuppa mundiala da passlung en la sesiun 2008/2009. Tar ils gieus Olimpics ha el gudagnà quatter medaglias dad aur, tar ils champiunadis mundials ina. Quatter giadas ha el pudì gudagnar la Tour de Ski ed il classament general da la cuppa mundiala da passlung.

Datas persunalas[modifitgar | modifitgar il code]

El è naschì ils 11 da mars 1986 a Santa Maria en la Val Müstair. La lingua materna è rumantsch, ultra da quai sa el anc tudestg, englais e talian.

Carriera[modifitgar | modifitgar il code]

Cumenzà ha il sport cun tschintg onns, numnadamain cun il sport da skis alpin. Il 1999 ha el midà tar il passlung, el era dentant anc activ en il ballape ed en il ciclissem. Il 2010 ha Cologna fatg la matura sco commember da la classa da sport a l‘institut Otalpin a Ftan.

L‘emprima giada tar ils champiunadis mundials dals juniors era Cologna il 2004 a Stryn en la Norvegia. A Kranji en la Slovenia dus onns pli tard ha el pudí gudagnar sia emprima medaglia als campiunadis mundials dals juniors, numnadamain la medaglia da bronz en la disciplina da 10 kilometers classic.

La fin da la sesiun 2006/2007 parta el per l‘emprima giada en la cuppa mundiala dal passlung, quai pervia da las prestaziuns fermas en il cup da las Alps. In onn pli tard è el vegní l‘emprima giada en la Top Ten en la cuppa mundiala, quai en 30 kilometers stil liber a Rybinsk. Il december 2008 maina Cologna sco emprim passlunghist svizzer il classament general da la Cuppa mundiala da passlung. Silsuenter ha el medemamain sco emprim passlunghist svizzer gudagnà la Tour de Ski. Ils 22 da mars 2009 è el alura vegní victur dal classament general da la Cuppa mundiala da passlung. En tut è el vegní quatter giadas victur dal classament general da la Cuppa mundiala da passlung, numnadamain il 2009, il 2011, il 2012 ed il 2015.

Occurrenzas grondas[modifitgar | modifitgar il code]

2010 a Vancouver tar ils gieus olimpics ha Dario gudagnà aur en la disciplina da 15 kilometers stil liber, quai è per la segunda medaglia tar ils gieus olimpics per ils passlunghists svizzers. Numnadamain Andi Grünenfelder aveva gudagnà a Calgary 1988 la medaglia da bronz. Il 2013 è stà l‘emprima medaglia per Cologna tar ils champiunadis mundials, ina dad aur en la persecuziun da 30 kilometers. Tar ils 50 kilometers stil liber è la medaglia dad argient vegnida vitiers. Tar ils gieus olimpics a Sotschi 2014 ha el gudagnà aur en la persecuziun da 30 kilometers stil liber ed en 15 kilometers classic. A Falun 2015 gudogna el argient en il Skiathlon, quai è la segunda medaglia dad argient a champiunadis mundials. Als champiunadis mundials a Lahti hai mancà be pauc per ina medaglia, el è numnadamain vegní quart. Il 2018 a Pyeongchang tar ils gieus olimpics gudogna el puspè aur en 15 kilometers stil liber.

Blessura[modifitgar | modifitgar il code]

Tar la preparaziun per la sesiun 2013/2014 è el sa blassà cun currer, plirs stgarps dal liom en la giugadira dal pe. El è vegní operads e tschintg emnas pli tard era el gia puspè sin ils skis. Var trais mais pli tard è el puspè enavos en la cuppa mundiala, quai gist cun in segund plaz.

Onur[modifitgar | modifitgar il code]

L‘onn 2013 è Cologna vegní sportist svizzer da l‘onn. Als gieus olimpics a Pyeongchang 2016 è el stà bandierel tar la festa dad avertura da la delegaziun svizra.