Davide Van De Sfroos

Ord Wikipedia
Jump to navigation Jump to search
Write.svg Questa pagina è scritta en puter.
Davide Van De Sfroos

Davide Van De Sfroos, pseudonim da Davide Bernasconi (Monza, 11 meg 1965), es ün chantadur e scriptur taliaun in Lingua Lumbarda.

Sieu pseudonim Van De Sfroos es üna versiun da üna fras, chi in dialect laghée (quel, chi vegn parlo illa spuonda ovest dal lej da Com) significhescha "fer cuntrabanda" ("sfrosadùr" voul dir "cuntrabandier"), activited fich frequaint i'ls lös, inua cha il chantadur viva.

La carriera scu chantadur[modifitgar | modifitgar il code]

L'iffaunt Davide Bernasconi get a viver a Mezzegra, sülla spuonda ovest dal lej da Com, inua cha el viva tuottadi, cur ch'el vaiva quatter ans.

Sia prüma experienza culla musica füt culla gruppa da musica "punk" Potage. Zieva qualche an fundet el la gruppa "folk" De Sfroos e cumanzet a scriver sias prümas chanzuns in dialect laghée. La gruppa fet trais album: Ciulandari! ("Pluffer!", 1992), Viif ("Viver", 1994) e Manicomi ("Ospidel dals narrs" 1995). Dal 1996 as dividet la gruppa.

Davide Van De Sfroos cuntinuet a fer musica "folk" cun la Davide Van De Sfroos Band, scrivand adüna chanzuns in laghée, e publichet als 1998 duos albums, Brèva & Tivàn (noms dals duos vents, chi boffan sül lej da Com: la "Breva" e'l "Tivano") e Per una poma ("Per ün pom"). Il prüm album as fet cugnuoscher dals critics musicals, chi predschet el fich; per que guadagnet Davide Van De Sfroos als 1999 il premi "Luigi Tenco" scu meglder chantautur al cumanzamaint da la carriera.

Dal 2001 publichet el l'album E semm partii ("E nus essans ieus davent"), chi guadagnet il Premi "Luigi Tenco" 2002 scu meglder album dialectel.

Successivamaing fet el ils albums Laiv (da la pronunzcha dal pled inglais "Live", 2003), Akuaduulza ("Ova dutscha", 2005) e Pica! ("Culpescha!", 2008). L'album "Pica!", vi pella sia prüma eivna da vendita, ragiundschet la quarta pusiziun illa parada da hits taliauna: que es d'adüs per ün album dialectel romanesc u napulitaun, ma na lombard.

Dal 2005 publichet Davide Van De Sfroos il DVD "Ventanas", chi cuntegna il meglder dals sieus concerts.

Davide Van de Sfroos ho piglio part a l'edicziun 2011 dal Festival da la chanzun taliauna da San Remo; el ho chanto Yanez, chanzun in lumbard laghée.

La carriera scu scriptur[modifitgar | modifitgar il code]

Davide Van De Sfroos ho eir scrit cudeschs, oter cha chanzuns: Perdonato dalle lucertole ("Parduno da las lintschernas", 1997), Capitan Slaff (2000), Le parole sognate dai pesci ("Ils pleds sömgedieus dals peschs", 2003) e Il mio nome è Herbert Fanucci ("Mieu nom es Herbert Fanucci", 2005).