Detga da Val

Questa pagina è scritta en sursilvan.

Avon bia onns sudeva l’alp Lampertsch davos Zerfreila als da Val. Denton ei la pli biala alp dalla val vegnida vendida pil pign prezi da melli ducats als Tessines. In advocat da Bellinzona duei haver scret la brev da vendita, cun indicau exactamein ils cunfins. Ins duei haver scret exactamien che la alp mondi d’ina vart tochen tier in cert crap, nua ch'ina crusch da crap steva e da l’autra vart buca pli lunsch che tochen tiel precipezi. - Da quella brev duei esser vegniu scret dus exemplars che omischduas partidas survegnien in exemplar.

Mo misteriusamein ei igl exemplar dils da Val ius a piarder. Ins sa buca sch’el ei vegnius engulaus ni piars, quei han ils Tessines udiu. Els han midau lur exemplar aschia che l’alp mava dad omischduas varts tuttina lunsch. Aschia han ils da Val pretendiu recliadat, cura ch’ils Tessines levan ir cun lur animals sur l’alp. Ils Tessines han pretendiu che l’alp mondi dad omisduas varts tuttina lunsch, quei stetti ella brev. Sil precipezi steva negina crusch pli ed screts vevan ils da Val era buca pli. Ils process han claramein ils Tessines gudignau. Denton ei il nausch, il qual haveva smenau naven la crusch da crap, daus cuort suenter en ina sfendaglia d’in glatscher. Liung temps ha el stuiu cavalcar sin in cavagl alv, da tutta malaura per la val entuorn e fageva duront la notg tema als pasturs ed al lur animals, tochen ch’el ei vegnius scatschaus sil glatscher da Lenta, nua ch’el sto star per adina.