Dretgira nauscha
Las dretgiras nauschas èn dretgiras extraordinarias che s'occupan da malfatgs visavi il stadi (cunzunt per tegnair a mastrin l'elita militara e politica). L'emprima giada vegna la noziun menziunada en il Kesslerbrief dal 1570 ed existivan fin il 18avel tschientaner. Quest tribunal sentenziava immediat e senza procedura d'appellaziun. Ma entras in'atgna dretgira nauscha instruida da la partida sentenziada pudeva lezza annullar la sentenzia.
Durant il 15avel tschientaner datti revoltas anarchicas, ma suenter la Landesreforma dal 1603 devi anc dapli dretgiras nauscha ch'avant.
Ina furma particulara da las dretgiras nauschas èn quellas tranter Tschaiver e Curaisma en il senn d'in gieu scenic durant il temp da Tschaiver. Il cumbat tranter in giunscher Tschaiver e la veglia dunna Curaisma vegn giugà en furma da tocs umoristics per il divertiment dal pievel. Questas duas persunas represchentan l'enviern e la primavaira ni la glisch e la stgirezza.