Il giat cotschen

Il giat cotschen è in raquint en vallader da Jon Semadeni ch'è cumparì l'emprima giada l'onn 1980. Il 1998 è cumparida en la retscha bilingua da la chasa editura Limmat a Turitg ina versiun vallader-tudestga.

Cuntegn

Il raquint tracta la vita dal vegl Chispar Rubar. Tar ina spassegiada el stgir vegn el persequità da regurdanzas. Il lectur vegn adina puspè tratg vi e nà tranter la realitad e las regurdanzas. Chispar po guardar enavos sin ina vita professiunala da success sco giurist e politicher. El aveva gronda pussanza, uschia ch'el pudeva er far chaussas illegalas. Ma quellas smatgan sin sia conscienza. Er sche Chispar Rubar emprova adina d'emblidar il passà, al surprenda quel adina puspè. In'istorgia d'in um pussant e corrupt che sto plaunsieu patir per il succedì en sia isolaziun.

Extract dal cudesch

Original vallader

«Mo eu cugnuosch quella said insaziabla chi implischa il magöl davoman ch'eu til svöd.
Eu cugnuosch quell'arsaja chi riva bavuns vers ün muond magic, liber da convenziun e retgnentschas, chi'm dà la dischanza d'aventürier e la sfruntadezza da rier sur da tuot mia miseria e da giodair il mumaint.»

– Il giat cotschen, p. 26

Translaziun en RG

«Mo jau enconusch quella said insaziabla che emplenescha gist puspè il magiel cur che jau al svid.
Jau enconusch quella gronda said che arva bavuns vers in mund magic, liber da convenziun e retegnientschas, che am dat la arroganza d'aventurier e la garmaschia da rir sur da tut mia miseria e da giudair il mument.»

Gieu auditiv

Sa basond sin l'acziun dal raquint original ha Jon Semadeni er scrit in gieu auditiv per il Radio Rumantsch. Tarablas da la not, ch'è vegnì producì sut la redacziun/reschia dad Ernst Denoth, è vegnì emess en duas parts ils 5 e 12 da schaner 1980 en il rom da l'emissiun Scuntrada – La marella.

Ediziuns

• Il giat cotschen. ediziun da Mengia Semadeni, Samedan 1980.
• Il giat cotschen - Die rote Katze Limmat Verlag, Turitg 1998.