Intensitad (terratrembel)

Ord Wikipedia

L'intensitad macroseismica è in mesira per inditgar ils effects d'in terratrembel sin persunas, edifizis e la cuntrada en ina zona limitada.[1] L'intensitad sa basa sin observaziuns da persunas en las zonas pertutgadas, ozendi èsi dentant era pussaivel da la mesirar cun indrizs tecnics. Per il solit (ma betg adina) è l'intensitad d'in terratrembel il pli ferm en la zona da l'epicenter e sa sminuescha cun distanza creschenta.

L'intensitad macroseismica vegn inditgada sin scalas a plirs stgalims. En l'Europa dovr'ins actualmain la Scala macroseismica europeica en la versiun dal 1998 (EMS-98) ed en il Stadis Unids ina versiun modifitgada da la Scala da Mercalli, che omaduas han dudesch stgalims. L'Uffizi meteorologic dal Giapun (JMA) fa diever d'in'atgna scala, la Scala JMA, che ha set stgalims.

Svilup istoric[modifitgar | modifitgar il code]

Emprovas temprivas per la classificaziun da terratrembels hai gia dà en il 18avel tschientaner. L'onn 1789 ha Pompeo Schiantarelli dissegnà dasper numerus maletgs dals effects dal terratrembel da Messina dal medem onn era ina charta da la zona pertutgada e l'onn 1788 ha Domenico Pignatoro elavurà ina scala a tschintg stgalims per descriver ils effects dal medem event. In'autra scala pauc derasada era quella da P.N.C. Egen che l'onn 1828 ha descrit ils effects d'in terratrembel en la Belgia.

Referenzas[modifitgar | modifitgar il code]

  1. makroseismische Intensität tar GeoDZ