Linux Mint

Ord Wikipedia
Midar tar: navigaziun, tschertga

Linux Mint è ina distribuziun dal sistem operativ Linux sin la basa dad Ubuntu. Dapi ils 7 da settember 2010 datti er in'ediziun che sa basa sin Debian.

Sin la pagina d'internet DistroWatch è Linux Mint dapi daditg ina da las tschintg distribuziuns las pli popularas.

Concept[modifitgar | modifitgar il code]

Il center da controlla da la versiun 2.2 (englais)

La distribuziun Linux Mint sa distingua dad Ubuntu be per intgins detagls. Quai èn en particular codecs per DVDs codads, MP3 u DivX sco era plug-ins sco Adobe Flash e Sun Java. Plinavant è en la versiun nova la groupware Evolution betg pli installada automaticamain. Ultra da quai datti in program per configuraziuns nov ed in menu surlavurà che tuts dus èn inspirads dal SUSE Linux Enterprise Desktop (SLED). En pli è NDISwrapper per il sustegn da cartas da WLAN senza in agen driver per Linux pre-installà ed i dat intgins programs ed instrucziuns che faciliteschan la communicaziun cun sistems Windows sin il meden ed auters computers. Technicamain dovr'ins las funtaunas da pechets dad Ubuntu ensemen cun in'autra, atgna che cuntegna ils pachets modifitgads e supplementars. Cun quai èn tut las actualisaziuns dad Ubuntu accessibel per ils utilisaders da Linux Mint. L'emprima versiun da la distribuziun è sortida ils 27 d'avust 2006.

mintMenu[modifitgar | modifitgar il code]

Ina da las particularitads da Linux Mint è il menu da controlla ch'è in svilup cumpletamain nov. Quai sa funda en sia structura sin quels da SUSE Linux Enterprise Desktop (SLED) u era Microsoft Windows Vista. Particularitads da mintMenu èn la pussaivladad da tschertagr en il menu sez ed in'opziun per metter en evidenza ils programs ch'ins dovra il pli savens. Per l'ediziun KDE vegn enstagl duvrà TastyMenu, in menu sumegliant ch'è vegnì sviluppà externamain.

Variantas[modifitgar | modifitgar il code]

Sco dad Ubuntu datti era intginas variantas supplementaras da Linux Mint che sa distinguan en l'ambient da lavurar, il manager da fanestras e/u ils pachets da software includids.

Gnome Edition[modifitgar | modifitgar il code]

Questa versiun standard (anteriurmain Main Edition) sa basa sin Gnome e cuntegna ulteriurs programs, codecs e plug-ins proprietars.

USA-Japan Distribution[modifitgar | modifitgar il code]

Dapi ils 29 da mars 2007 datti ina USA-Japan Distribution (anteriurmain Light Edition u Universal Edition). Questa versiun n'includa nagina software protegida u patentada ed è adressada ad utilisaders che prefereschan software libra ed ad utilisaders en pajais nua che il chargiar giu d'ina distribuziun cun software protegida u patentada è scumandà. En questa versiun n'èn pia betg includs Adobe Flash (remplazzà cun Gnash), sustegn per DVDs codads, codecs da Windows, sustegn per furmats protegids (p. ex. MP3), Unrar e Sun Java.

KDE Community Edition[modifitgar | modifitgar il code]

Ils 20 d'avrigl 2007 èn sco cumplettaziun da la famiglia da distribuziuns da Linux Mint vegnids publitgads la KDE Edition e la pli pitschna miniKDE Edition che omaduas dovran empè dal desktop Gnome la KDE Plasma sco desktop.

Xfce Community Edition[modifitgar | modifitgar il code]

Ils 7 d'avust 2007 è vegnida publitgada la Xfce Community Edition sco ulteriur commember da la famiglia da distribuziuns da Linux Mint. Questa ediziun dovra il desktop Xfce. Quest ambient da lavur è adattà particularmain per computers pli vegls, quai che ha per consequenza che la distribuziun aviescha fitg spertamain sin hardware moderna.

Fluxbox Community Edition[modifitgar | modifitgar il code]

La Fluxbox Community Edition è cumparida l'emprima giada ils 21 d'october 2008. Ella sa basa sin las variantas Gnome ed Xfce, ma utilisescha il manager da fanestras Fluxbox e dovra be 256 MB da RAM.

LXDE Community Edition[modifitgar | modifitgar il code]

Ils 31 da mars 2010 è cumparida per l'emprima giada la LXDE Community Edition. Ella sa basa sin la varianta Gnome, ma utilisescha l'ambient da lavur LXDE.