Paiver da Sichuan
Il paiver da Sichuan (Zanthoxylum piperitum), era numnà paiver chinais u paiver giapunais, è ina spezia da plantas or da la famiglia da las rutaceas (Rutaceae). El producescha ina spezaria picanta e n'è betg parentà cun il paiver nair (Piper nigrum). Er autras spezias dal gener Zanthoxylum, p. ex. Zanthoxylum schinifolium vegnan numnadas paiver da Sichuan.
Il gener Zanthoxylum, che cumpiglia las differentas spezias da paiver da Sichuan, appartegna a la famiglia da las rutaceas ed è cun quai parentà cun las plantas da citrus (Citrus). Il num dal gener ch'ins po translatar cun «lain mellen» descriva in tratg caracteristic da la planta; «lain mellen» numn'ins diversas spezias da divers geners.
Il num paiver da Sichuan deriva da la provinza centralchinaisa da Sichuan, nua ch'el è indigen e vegn duvrà gugent en chadafieu. Sco era tar la provinza chatt'ins ins diversas variantas da scriver sco paiver da Sichuan, Sechuan u Szetschuan. Auters nums ch'èn derasads en Europa includan paiver da muntagna, paiver chinais e paiver giapunais.