Pulp Fiction

John Travolta, Uma Thurman e Quentin Tarantino (2014)

Pulp Fiction è in film da Quentin Tarantino da l’onn 1994. Il film è vegnì nominà per set Oscars – tranter auter sco meglier film – ed ha gudagnà en la categoria meglier scenari original. En rom dal Festival da film a Cannes ha Pulp Fiction gudagnà la Palma d’aur. Plinavant è il film cuntegnì en la glista dals 100 megliers films ch’il Time magazine ha mess ensemen.

Il titel dal film deriva dal linguatg dal mintgadi e signifitgescha verbalmain «litteratura triviala u da pauca valur». ‹Pulp Fiction› numn’ins per englais ils romans da kiosc che cuntegnan per regla pliras istorgias curtas. Il film sa cumpona da trais episodas ch’èn entretschadas ina en l’autra e che vegnan raquintadas en successiun na cronologica.

Prolog ed emprima scena principala

En in curt prolog sesan ils dus bandits Pumpkin e Honey Bunny en in restaurant e decidan da spogliar quel. La sequenza finala dal film vegn a reprender quest’episoda.

I suonda in sigl tar ina scena che tutga tar l’episoda The Bonnie Situation da pli tard: Jules Winnfield (Samuel L. Jackson) e Vincent Vega (John Travolta) èn dus assassins d’incumbensa. Per lur boss, il gangster Marsellus Wallace (Ving Rhames), van els tar anteriurs ‹partenaris da fatschenta› a prender vendetga. Els entran en in’abitaziun. Gia suenter in curt discurs sajetta Jules in dals umens. Suenter avair chattà la valisch da Marsellus sajettan els in ulteriur um.

Vincent Vega and Marsellus Wallace’s Wife

Il boxist Butch (Bruce Willis) retschaiva daners da Marsellus per ch’el perdia il gieu en la tschintgavla runda. Butch e Vincent han in curt (e fraid) inscunter. L’auter di cumpra Vincent heroin tar il dealer Lance e sa metta ina squitta. Silsuenter va el tar Mia Wallace (Uma Thurman), la dunna da Marsellus, ch’el ha da proteger durant l’absenza dal schef. Els dus van en il Jack Rabbit Slim’s, in local endrizzà en il stil dals onns 1950. Là sa participeschan els era ad ina concurrenza da twist.

Returnads a chasa engira Vincent sin tualetta, da betg sa laschar surmanar da Mia. Durant si’absenza chatta Mia in satget en il mantè da Vincent, craja che quai saia cocain e collabescha suenter avair sgnuflà il heroin. Vincent porta ella tar il dealer da drogas Lance e sia dunna Jody. Cun agid d’ina injecziun d’adrenalin directamain en il cor vegnan els da spendrar Mia. Vincent e Mia sa cunvegnan, da betg raquintar a Marsellus davart il succedì.

The Gold Watch

Cronologia da las singulas scenas dal film

Il boxist Butch sa regorda da quel di en si’uffanza, cur ch’in um al aveva purtà l’ura da ses bab ch’era crudà en la guerra. Ma ils patratgs da Butch returnan spert puspè tar ses preschent pauc glorius: El sa lascha pajar da Marsellus Wallace per perder lutgas da boxar. Oz vul Butch dentant far fin cun questa faussadad. El terrescha ses adversari, e quai da tala maniera che lez mora sin il plaz. Uss vul Butch fugir cun si’amia Fabienne e cun ils daners gudagnads da scumetter sin sasez. Ma Fabienne ha emblidà l’ura dal bab da Butch en l’abitaziun. Butch returna a chasa, trapla là Vincent e sajetta lez.

Sin viadi da return tar si’amia frunta el per casualitad sin Marsellus. Els battan in cun l’auter e sa tschentan la finala en in’agenzia da credits sin pegn. Maynard, il possessur da la stizun, als smanatscha cun la buis ed als serra en tschaler. Là ha el endrizzà ensemen cun ses ami Zed ina chombra da tortura. Zed violescha Marsellus. Ma Butch vegn da sa liberar, mazza Maynard e liberescha Marsellus. Lez di a Butch ch’els dus sajan quit sut la cundiziun che Butch svaneschia or da la citad. Entant che Butch va tar Fabienne per cumenzar ina nova vita, cloma Marsellus succurs per prender vendetga vi da Zed.

The Bonnie Situation

I suonda in sigl enavos tar l’emprima scena principala dal film. Suenter che Jules e Vincent avevan mazzà ils dus bandits Roger e Brett siglia in terz or dal bogn e sajetta sin els tut sia muniziun – dentant senza gartegiar. Damai che Jules è persvass – suenter avair sajettà il terz bandit – che quai saja ina miracla, vul el dar si sia ‹professiun› da gangster.

Jules e Vincent prendan Marvin, il sulet survivent, cun els en l’auto. Durant il viadi al sajetta Vincent senza vulair en il chau. Arrivads tar Jimmie, in ami da Jules, als trametta Marsellus Mr. Wolf (Harvey Keitel) che ‹gida a sclerir la situaziun›. La finala van els tar il garaschist Monster-Joe che dismetta l’auto e la bara sin ses deposit da fier veder.

Silsuenter van Jules e Vincent en in restaurant. Durant che Vincent è sin tualetta, provan ils dus bandits Pumpkin e Honey Bunny da spogliar il local – qua cuntinuescha il prolog dal film. Ma Jules als vegn da surventscher e da fugentar. Er Jules e Vincent sortan dal restaurant.

Cronologia

Singuls motivs sco la valisch da Marsellus u la vestgadira da Vincent e Jules mussan co che las singulas parts dal film tutgan ensemen: En l’emprima scena principala van Vincent e Jules en l’abitaziun dals bandits per la valisch; sin viadi da return fruntan els en la Bonnie Situation e ston midar lur vestgadira ch’è plaina da sang. Suenter la scena da restaurant (prolog e scena finala) en quest tenue provisoric portan els enavos a l’entschatta da l’episoda Vincent Vega and Marsellus Wallace’s Wife a Marsellus la valisch. Quai succeda gist suenter che lez è sa cunvegnì cun Butch davart la lutga da boxa – che furma la basa da l’episoda The Gold Watch. Sco Vincent menziunescha, ha l’episoda Vincent Vega and Marsellus Wallace’s Wife lieu il di suenter The Bonnie Situation. L’episoda situada a la fin da la cronologia è The Gold Watch, nua che Vincent vegn per la vita.

Litteratura

• Quentin Tarantino: Pulp Fiction. Das Buch zum Film. Rowohlt, Reinbek bei Hamburg 1994 ISBN 3-499-13630-9

Colliaziuns

• Pulp Fiction en la Internet Movie Database
• Trailer uffizial dal film