Stretga da La Pérouse

Ord Wikipedia
Jump to navigation Jump to search
La stretga da La Pérouse cun Sachalin davosvart, vesì dal cap Sōya.
La stretga da La Pérouse, cartografada da La Pérouse sez.

La stretga da La Pérouse (russ Пролив Лаперуза, Proliw Laperuza) u stretga da Sōya (宗谷海峡 Sōya-kaikyō?) è ina stretga da mar che separescha la part meridiunala da l'insla russa Sachalin dal nord da l'insla giapunaisa Hokkaidō.

Ella collia la mar dal Giapun en il vest cun la mar d'Ochotsk en l'ost. Ella è 94 km lunga ed, a ses punct il pli stretg, 43 km lada. Sia profunditad media è tranter 20 e 40 m, il punct il pli profund è sin 118 m.

Ses num internaziunal va enavos a Jean-François de La Pérouse, che l'ha scuvert il 1787[1] ensemen cun il cap Crillon. Ses num giapunais deriva dal num dal cap Sōya sin Hokkaidō.

Las auas territorialas giapunaisas tanschan be trais miglias marinas en la stretga da La Pérouse, enstagl da las 12 miglias normalas; quai che permetta a bastiments da guerra e sutmarins da la Marina dals Stadis Unids (US Navy) ch'èn equipads cun armas nuclearas da traversar la stretga senza violar il scumond dal Giapun cunter armas nuclearas en ses territori.[2]

Referenzas[modifitgar | modifitgar il code]

  1. Istorgia da Sachalin: 17avel e 18avel tschientaner (englais)
  2. Kyodo News, "Japan left key straits open for U.S. nukes", Japan Times, 22 da zercladur 2009 (englais)