Unihockey

Questa pagina è scritta en sursilvan. Igl exista er in artitgel davart il medem tema en rumantsch grischun.

Unihockey ei in sport che vegn dau bunamein mo ell'Europa. Quei sport vegn era ella Svizra pli e pli populars. Uriundamein vegn igl unihockey sco era il hockey da glatsch dil Bandy. Per giugar drov'ins mo in fest ed ina buora d'unihockey.

Internaziunal & Svizra

Internaziunal vegn unihockey dau 5 encunter 5, denton vegn mo ella Svizra era aunc dau 3 encunter 3. Quei vegn dallas hallas da gimnastica veglias che eran ella Svizra pli pintgas che hallas egl'exteriur. Denton vegn quei sport dau mo entochen certas ligias 3 encunter 3, ellas pli aultas ligias (per exempel Ligia naziunala A) vegn ei mo pli dau 5 encunter 5. Quintau vegn cheu mintgamai ils giugadurs senza goli.

Furnitura

Duvrau per quei sport vegn atgnamein buca biar. Sulet il goli ei en ina furnitura che dueigi schurmegiar el. El ha vestgiu in protegia pèz, ina caultscha pulstrada, ina capellina ed ils biars tilan aunc en vons chi pezgia buca aschi fetg dallas buoras. In giugadur denton sto buca trer en ina entira furnitura sco el hockey da glatsch, quels drovan mo ina caultscha cuorta, in t-shirt, calzers ed in fest.

Per dar quei sport vegn denton aunc duvrau in gol e bandas d'unihockey.

Reglas

Unihockey ha buca biaras reglas, denton ein ellas pli strentgas che tiel hockey da glatsch. Ei dat reglas pil giug (fest ault, bulli, entschatta d'in giug) ed era reglas per igl equipament dils giugadurs, aschia astga la palla buca haver in curva pli gronda che 3 centimeters. Schiglioc sa l'equipa adversaria metter en protest e quel giugadur sto midar fest ni astga schizun buca pli dar per quei giug.

Unihockey ella Svizra

Igl unihockey ei ella Svizra cun 27'000 licenzas il sport d'equipa cun il segund biars giugadurs licenziai. Tut en tut dat ei ella Svizra 441 uniuns d'unihockey che ein organisai en 1979 squadras. Ils davos onns vegn quei sport oravontut tier giuvens adina pli e pli populars. Igl ei ella Svizra il tierz pli popular sport suenter ballapei e buora volley. Ella Svizra vegnan biars campiunadis differeziai suenter la vegliadetgna organisai. L'organisaziun dils campiunadis ei tier la Associaziun Svizra d'Unihockey (Schweizer Unihockey Verband).