Uniun da giuventetna Riom-Parsonz

Ord Wikipedia
Jump to navigation Jump to search
Write.svg Questa pagina è scritta en surmiran.
Igl logo da l'uniun cugl motto Egn per tots - tots per egn
Commembers da l'uniun da giuventetna Riom-Parsonz

L'Uniun da giuventetna Riom-Parsonz è en'uniun, alla cala mintga gioven betg marido e mintga giovna betg maridada digl cumegn Riom-Parsonz pò antrar siva igl taimp da scola obligatoric. Igl motto da l'uniun è: Egn per tots - tots per egn (Einer für alle, alle für einen).

L'uniun dombra 37 commembers (stadi 2012/13).

Senn[modifitgar | modifitgar il code]

Tenor igls statets è igl senn da l'uniun da:

  • prospetar las relaziuns tranter la giuventetna da Riom-Parsonz
  • mantineir usits e tradiziuns
  • promover la veta culturala an chellas dus vischnancas

Daple tgi forsa anc avant onns è ozande igl scopo da mantigneir igl contact tranter igls giovens tg’èn carschias se an las dus vischnancas. Chegl veaple, cunchegl tgi blers giovens bandungan la val ord muteivs professiunals.

Istorgia[modifitgar | modifitgar il code]

L’uniun da giuventetna exista gio siva dall’antschatta digl davos tschentaner. Igls giovens, chegl vot deir digl davos onn da scola anfignen tgi antravan aint igl stand da matriomoni, vevan la pussebladad da mantigneir culturas e tradiziuns ed esser an cumpagneia ainten en’uniun, numnadamaintg la Cumpagneia da Mats u oz l’Uniun da Giuventetna. Las mattas eran da chel taimp betg anc commembras dall’uniun da giuventetna; ellas èn pir davent digl onn 1978 dalla parteida. Tradiziunalmaintg organisava la cumpagneia da mats da lez taimp ena notg da tschever. Per chella occurrenza veva mintga gioven dad eir a tgesa tar ena matta e dumandar agls genitours la feglia scu ballerigna per chella festa. Igls president digls giovens, tgi niva numno "Platzmeister", cumandava a mintga gioven tge matta tg’el possa eir a dumandar; pigl solit vevan igls pi giovens dad eir per las mattas las pi viglias. Scu angraztgamaint per la festa spurschivan alloura las mattas ena seira da latg-meltg. Chella seira nivigl pigl solit salto, schi ensatgi sunava sen ena geia da bucca u schi vevan en grammofon. La mintinada totga tar egna dallas pi viglias tradiziuns an nossa regiun. Pi bod era la tschagna da nozzas adegna ainten la tgesa digl spous u dalla spousa. Scu angraztgamaint per la mintinada ed igl pled dastgeva er la giuventetna pigleir part alla tschagna da nozzas. Siva tschagna gevan igls giovens cun lampiuns an til tras vischnanca. An tgesa da scola niva alloura festivo ansemmen cugls nozzadours anfignen la dumang ed igl butschign vegn da 70 – 80 liters na tanscheva betg adegna.

Igl onn 1981 èn las uniuns da giuventetna dallas vischnancas Riom e Parsonz s’uneidas.

Mintinadas[modifitgar | modifitgar il code]

Mintga commember tgi sorta dalla uniun da giuvententa tras miridar ò da dar ena seira da baralot per l'antier'uniun. Per paia dat l'uniun igl de da nozzas las mintinandas. Ainten la canzung Las Mintinadas, tg'igls giovens cantan pigl spusalezzi, peglia igl spous/la spousa cumgea da mintga member da la famiglia e la finala da tot la giuventegna e da tot anturn, anturn. Betg mantger dastga igl pled digl president, noua tg’ins lascha reveiver anc eneda las asnareias durant igl taimp nubil dalla spousa e digl spous.

Activitads[modifitgar | modifitgar il code]

L’activitad la pi gronda mintg’onn è igl teater; e chegl gio siva digl onn 1964! Igl teater è egna dallas activitads, tgi vign visitada fitg numerousamaintg. Dasper igl teater magna l'uniun mintgamai la premaveira tras ena "Wallstreetparty" an la Caldera a Parsonz. Er la premaveira sa cattan igls commembers mintg’onn per passantar ansemmen en de da divertimaint u en de da lavour. La festa d’amprem avost per las vischnancas da Riom e Parsonz vign er organisada da l’uniun da giuventetna. Betg d’amblidar è, tgi l’uniun vò mintga dus onns ansemmen sen viadi. Igls lis da destinaziun èn fitg differens scu per exaimpel Paris, Rhodos (2000), Berlin (2002), Garda (2004), Londra (2006), Minca (2008), Prag (2010), la Mar Neira a Bulgaria (2012), Edinburgh (2014), ni schizont a New York (2016).

Suprastanza[modifitgar | modifitgar il code]

La suprastanza sa cumpona da (stadi 2017/18):

  • President Giatgen Mitgel Bellini
  • Vicepresident Lino Schmid
  • Actuar Curdin Collet
  • Cassier Andrea Collet
  • Commember an suprastanza Enrico Carisch

Colliaziuns[modifitgar | modifitgar il code]

Commons Commons: Uniun da giuventetna Riom-Parsonz – Collecziun da maletgs, videos e datotecas d'audio