Utilisader:Andreas/Plazzals/Pro Helvetia
La Pro Helvetia è ina fundaziun culturala svizra cun sedia a Turitg. La Pro Helvetia è responsabel per la represchentaziun culturala da la Svizra a l'ester, per il dialog cultural tranter las differentas parts dal pajais e per la promoziun dals arts en il context surregiunal.
Istorgia e basa legala[modifitgar | modifitgar il code]
La Pro Helvetia è vegnida fundada il 1939 sco organisaziun per la defensiun naziunala spiertala. Il 1949 è ella daventada ina fundaziun dal dretg public. La lescha davart la Pro Helvetia dals 17 da december 1965 ha dà a la fundaziun la suandanta incumbensa revedida:
- mantegniment e tgira da l'atgnadad culturala dal pajais.
- promoziun dal stgaffir cultural, sin basa da las relaziuns en ils chantuns sco era en ils territoris linguistics e circuls culturals.
- promoziun dal barat cultural tranter ils territoris linguistics e circuls culturals da la Svizra.
- tgira da las relaziuns culturalas cun l'ester.
Dapi il 1981 sustegna la Confederaziun la fundaziun creada entras lescha federala cun conclus da credit che han mintgamai ina durada da quatter onns e vegnan fatgs a basa dad in program approvà dal cussegl da fundaziun.
Champs d'activitad[modifitgar | modifitgar il code]
Las activitads da la Pro Helvetia sa laschan zavrar en dus secturs: en il sustegn da projects sin dumonda ed en projects lantschads da la fundaziun sezza. 70 % da las finanzas operativas van a projects da persunas ed organisaziuns activas sin il champ cultural. 15 % da las finanzas stattan a disposiziun dals post exteriurs (biros da colliaziun) en Frantscha, Pologna, Egipta, Africa dal Sid ed India. 10 % van en programs 5 % en l'infurmaziun culturala.
La Pro Helvetia dat oz paisa als suandants puncts:
- promoziun dal stgaffir artistic contemporan (sin ils champs musica, litteratura, teater e saut)
- barat cultural (intermediar stgaffir cultural svizzer a l'ester e tranter las differentas culturas da la Svizra)
- infurmaziun davart la cultura svizra
La promoziun da la cinematografia svizra ha la Pro Helvetia surlaschà a la Swiss Films.