Utilisader:Mesoscaph/Cudeschs/Giats gronds selvadis/Giat dal desert

Detagls interessants Giats dal desert miaulan en tuns bass e giappan schizunt per pudair communitgar sur lungas distanzas. La gronda part dals giats dal desert na baivan mai aua. Quella è gea er vaira rara en il desert. Il liquid basegnaivel obtegnan els cun magliar lur preda.

Territori da derasaziun dal giat dal desert (cotschen)

Il giat dal desert ha gugent l'extrem. Tuttina sco ch'in leopard da la naiv po surviver bain en grondas fradaglias, supporta il giat dal desert fitg bain la chalira.

Nua vivan giats dal desert?

Sco ch'il num di gia, è il giat dal desert da chattar en regiuns da desert sablunusas, povras d'aua en l'Africa dal Nord, l'Arabia ed en intgins territoris da l'Asia Centrala e dal Pakistan.

Co vesan giats dal desert or?

Giat dal desert en in parc zoologic

Animal giuven

Il corp dal giat dal desert è adattà perfetgamain a la vita en il desert. Il pail mez lung è spess ed al preserva dal fraid extrem da las notgs en il desert. Lur pes e ballas dals pes èn cuverts cun lungs chavels, protegian uschia da la chalur da la surfatscha dal desert e dattan sustegn supplementar sin il sablun lom che tschessa e sin naiv. Las grondas ureglias triangularas reageschan a moda fitg sensibla sin ils minims tuns.

Il giat dal desert cuntanscha be ina lunghezza da 45 fin 55 cm. La cua vegn anc vitiers cun 30 fin 35 cm. Cun quai è el cleramain pli pitschen ch'in giat da chasa.

Tge maglian giats dal desert e co tschiffan els lur preda?

Purtret cun las ureglias caracteristicas

Exemplar en ses ambient natiral

Giats dal desert vivan a moda solitaria e van perquai sulets a chatscha la notg. Las pli chaudas uras passentan els durmind sut chaglias aspras u en fops planivs en il sablun. Suenter la rendida dal sulegl vegnan els activs e bandunan lur zup en tschertga da nutriment. Quel cumpiglia pitschens animals ruiders sco il gabril e la mieur sigliola, reptils ed utschels. Er insects e serps da tissi na sdegnan els betg. Magari tschiffan els er preda ch'è pli gronda ch'els sezs.

Co tiran giats dal desert si lur giuvens?

Las femellas partureschan in fin otg giattels per letg, per il pli èn quai quatter u tschintg. Giats dal desert creschan svelt e daventan sur sasez cur ch'els han cuntanschì dus terzs da la grondezza da creschì. Creschids dal tuttafatg èn els cun ca. 14 mais.