Utilisader:Mesoscaph/Cudeschs/Giats gronds selvadis/Giat dals pes nairs

Detagls interessants

Giats dals pes nairs chavan fitg gugent e bain. Cuntrari a noss giats da chasa sa servan els dad omaduas toppas per chavar.
Sche l'animal sto sa defender, è el fitg curaschus. Perquai al numnan ins er ‹il tigher dal furmicler›.
In giat dals pes nairs sto magliar per notg ca. in quart kilo; quai è radund in sisavel da ses agen pais.

Davart il giat dals pes nairs savain nus pli pauc che davart autras spezias da giats. Il motiv pudess esser ch'i sa tracta dal pli pitschen e pli rar giat african. Ultra da quai è el fitg spuretg e be activ enten far stgir e la notg.

Nua vivan giats dals pes nairs?

Giats dals pes nairs vivan oravant tut en territoris sitgs en la part meridiunala da l'Africa, surtut a Namibia, Botswana ed en l'Africa dal Sid.

Co vesan giats dals pes nairs or?

Er sch'els han num ‹pes nairs›, èn be las parts sut da las toppas nairas. Survart èn ellas brin cleras. Il pail è cler ed ha blers flatgs nairs. Er il piz da la cua è nair.

Tge maglian giats dals pes nairs gugent e co tschiffan els lur preda?

Uschia vesa or il spazi da viver natiral dal giat dals pes nairs

Ils giats na raivan betg uschè gugent, mabain van pli gugent a chatscha per terra. Els fan surtut chatscha suenter mieurs ed utschels.

Co tiran giats dals pes nairs si lur giuvens?

Giats dals pes nairs han per ordinari dus pitschens. I pon però er esser trais u quatter. Ils giuvens vegnan probablamain pli svelt creschids ch'ils giats da chasa. Ha in giat dals pes nairs pitschens, mida el mintga sis fin diesch dis la tauna per proteger ils giuvens d'inimis.