Utilisader:Mesoscaph/Cudeschs/Giats gronds selvadis/Leopard nivlus

Detagls interessants Leopards nivlus pon raiver da bists da plantas giuador cun il chau ordavant. Sumegliant a giats da marmel e margays, pendan els magari cun il chau engiu vi da roma e sa tegnan be cun las chommas davos. Leopards nivlus naschan cun flatgs en il pail che sa transfurman pli tard, cur ch'els vegnan pli vegls, en surfatschas avertas ‹nivlusas›.

Territori da derasaziun actual dal leopard nivlus

Malgrà ses num na sa tracti tar il leopard nivlus betg d'in leopard per propi. Sco ils dretgs leopards da l'Africa passentan els però fitg bler temp sin las plantas.

Nua vivan leopards nivlus?

Animals creschids che sa charsinan

Leopards nivlus èn da chasa en la China dal Sid, en la part orientala da la muntogna dal Himalaia sco er en l'Asia dal Sidost ed Indonesia. Els prefereschan guauds subtropics u tropics, ma vivan er en palids da mangrovas e sin pastgiras.

Co vesan leopards nivlus or?

Chavazza d'in leopard nivlus

En libertad capiti be darar ch'in leopard nivlus po vegnir observà

En la vegliadetgna da creschì cuntanscha in leopard nivlus ina lunghezza da ca. 80 fin 105 cm (lunghezza dal chau e dal bist). Per sia grondezza ha il leopard nivlus plitost curtas chommas. Ses dents da tschiffar han ina lunghezza da ca. 5 cm. El dispona uschia dals pli lungs dents chanins da tut las spezias da giats che vivan anc ozendi. Be il tigher cun dents da sabel aveva anc pli lungs dents chanins. Ma quel è gia mort or.

Leopards nivlus èn excellents raividers. Uschia pon els er tschiffar pli gronds animals da preda che vivan en las plantas. Per pudair ir a chatscha cun success, dispona il leopard nivlus da chommas curtas e flexiblas cun grondas toppas e griflas gizzas. Equipà en questa moda, ha el avunda success da chatscha en ses ambient. Sia cua po esser tuttina lunga sco ses corp. Quella gida il giat da tegnair l'equiliber, cur ch'el ballantscha tras las plantas. Igl è strusch da crair, ma quest animal po pender cun il chau engiu sut roma e schizunt raiver cun il chau ordavant da bists da plantas giuador. Autras spezias da giats n'èn betg ablas da far quai, perquai che lur griflas èn furmadas uschia ch'els ston adina raiver cun la cua engiu da la planta giuador.

Animal giuven en il zoo da Nashville

In leopard nivlus sa lascha enconuscher fitg bain vi da ses fitg bel muster en il pail. Ils gronds flatgs quadrangulars, stgirs vesan or per blers umans sco nivels u panuglias da tschajera. Uschia è l'animal er vegnì tar ses num ‹leopard nivlus›. Igl è in sbagl da crair ch'il leopard nivlus giria be enturn en la tschajera. En ses revier da chatscha na datti numnadamain gnanc uschè savens tschajera.

Tge maglian els e co tschiffan els lur preda?

Nus na savain betg fitg bler davart il cumportament da leopards nivlus en libertad. Lur preda furman probablamain oravant tut mammals che vivan medemamain sin plantas, pia oravant tut schimgias. Latiers tschiffa el er mammals pli pitschens sco portgs selvadis. Medemamain utschels, e sch'ins na fa betg attenziun, sa patruna el er d'animals da chasa sco chauras e giaglinas.