Utilisader:Mesoscaph/Cudeschs/Giats gronds selvadis/Ozelot

Detagls interessants

Il num ozelot deriva dal pled aztec tlalocelot che munta tant sco ‹tigher da la champagna›.
Ozelots han be 36 pèrs cromosoms, entant che la gronda part da las autras spezias da giats han 38 pèrs.
Lur proxims vischins, il margai ed il giat-tigher, han medemamain be 36 pèrs cromosoms.
Els pon savens seser là ina mes'ura senza far il minim moviment, per alura surprender nunspetgadamain lur preda.
Intgins observaturs sminan che ozelots sajan fidaivels a lur partenaris.

L'ozelot è in bel giat da grondezza mesauna, dal qual la coluraziun regorda fermamain al jaguar ch'è bundant pli grond. Pervi da ses muster è il pail fitg tschertgà, perquai vegn fatg savens chatscha sin l'ozelot. La chatscha nuncontrollada avess bunamain manà a l'extirpaziun da questa spezia, cumbain che la situaziun è sa midada ils ultims onns tras meglra protecziun.

Nua vivan ozelots?

Ozelots èn surtut derasads en l'America Centrala e dal Sid, ma cumparan vers nord er fin en las parts meridiunalas dals Stadis Unids. Igl èn enconuschentas indesch differentas sutspezias dad ozelots, las qualas vivan tuttas en differentas parts da l'America dal Sid.

Trais da las sutspezias vivan en il Mexico ed autras en l'Amazonas, en guauds a l'Atlantic, en il nord da las Andas (Venezuela e Guyana) ed auters pajais en l'America dal Sid sco Argentinia, Columbia, Brasilia, Bolivia, Ecuador e Paraguay.

Ozelots èn fitg buns nudaders, van però per il pli a chatscha per terra ed èn normalmain be activs la notg. Durant il di dorman els sin plantas, en chaglias u pastg spess. Intgins dad els vivan a moda solitaria, uschia sco che fa quai la gronda part dals giats. Tar auters è vegnì observà ch'els vivan sco pèrs e mantegnan il contact cun miaular. En fermanza daventan blers ozelots fitg dumestis e confidents envers l'uman.

Co vesan ozelots or?

Ozelots han ina lunghezza dal corp da ca. 1 m. Vitiers vegn anc ina lunghezza da la cua da 45 cm. En lur cumparsa sumeglian els il giat-tigher in pau pli pitschen ed il margai ch'èn da chasa en il medem spazi da viver. Il pail da l'ozelot è dad aur cun flatgs nairs. Els èn fitg satigls, han lungs dents e pon siglir relativamain lung.

Tge maglian ozelots e co tschiffan els lur preda?

Ozelots maglian surtut pitschens animals. Els tschiffan schimgias, serps, ruiders ed er utschels. Praticamain tut ils animals, sin ils quals els fan chatscha, èn pli pitschens ch'els sezs. Ils scienziads supponan ch'ils ozelots chattan lur preda cun agid da lur odurat, cun suandar lur fastizs per terra. Els pon vesair fitg bain en il stgir e sa movan quasi a moda nunudibla.

Co tschiffan ins in ozelot?

Scienziads dal reservat en il sid da Texas avevan difficultads da chattar ils paucs ozelots en questa regiun. Els han empruvà cun da tuttas sorts savurs d'animals, ma betg in sulet animal è sa mussà. Uschia èsi stà in cas da fortuna per ils scienziads cur ch'è capità insatge dal tuttafatg nunspetgà. In lavurant en il reservat era sa parfumà cun Obsession, in parfum dad umens. In di ha in ozelot empruvà da sa sfruschar vi da quest lavurant, per pudair prender si meglier si'odur. Da qua davent han ils scienziads savì che ozelots han gugent Obsession. Els emprovan uss da sa servir da quest parfum per augmentar en rom da quest project da protecziun il dumber dals ozelots.