Gazetta ordinaria da Scuol
La Gazetta ordinaria da Scuol è stada ina gasetta emnila, l'emprima gasetta rumantscha e l'emprima gasetta grischuna insumma. Ella cumpareva enturn l'onn 1700 a Scuol en l'Engiadina Bassa.
Infurmaziuns davart la gasetta datti fitg paucas cunquai ch'ils fegls èn svanids. L'editur è stà il chancelier Joan Marnia, ina figura da grond'influenza en la politica communala da Scuol.[1] Stampà ha ella Ludovico Gadina en la Chasa Dorta, che ozendi ha num Chasa Baer-Gaudenz. Sco conferma la pli impurtanta per l'existenza da la Gazetta ordinaria da Scuol vala il seguent citat da la gasetta Il Republicano dal 1843:[2]
«Blers crajan cha l'interpraisa da dar oura gazettas romantschas sia üna novità. Ins ais gnü protramiss üna gazetta romanscha chi ais stampada fingia avant 143 anns. Quella ais titulada «Gazetta ordinaria da Scuol» stampa da Ludovico Gadina. A noss savair non aisa da quel temps nianc in Coira gnü stampà gazettas; et usche füssen nus Engiadinais ils prüms chi han tgnü gazettas in noss cantun»
– Il Republicano, nr. 4, 1843
Ina communicaziun correspundenta sa chattava er en L'Aurora d'Engiadina:[3]
«Facilmaing avrà ogni ün podü observar, sch'el ha let nossas novas gazettas ladinas, chi han pero gnü avant 143 ans daià üna sour in Scuol.»
– L'Aurora d'Engiadina, nr. 11 dal 1843
Men Rauch era da l'avis che la Gazetta ordinaria da Scuol haja chattà sia fin l'onn 1730, cura che l'iniziant dal fegl, il chancelier Marnia (tar Men scrit Margna) da Scuol, ch'aveva in'impurtanta butia da colonialias a Vienna, ha pers si'influenza en Engiadia.[4]
Referenzas [modifitgar]
- ↑ Istorgia da la vischnanca da Scuol, pagina d'internet uffiziala da la vischnanca da Scuol
- ↑ Christian Caduff: La pressa romontscha. En: Annalas. nr. 77 (1964)
- ↑ Rauch 1933 (cità tenor Cantieni 1984, p. 11)
- ↑ Rauch 1933 (cità tenor Cantieni 1984, p. 11)
Litteratura [modifitgar]
- Pressa dal Grischun en il Lexicon istoric retic
- Men Rauch: Gazetta Ordinaria Scuol. En: Gazetta Ladina. nr. 27 da la 12avla annada (1933), p. 1
- Anna Maria Cantieni: Geschichte der rätoromanischen Presse in Graubünden. 1984 (o.t. p. 10–12)
- Verein der Schweizer Presse: Die Schweizer Presse: La presse suisse. Druck von Jent, 1896
