Ordino

Ordino
Ordino l'enviern
Posiziun
Parròquia da l'Andorra
Populaziun	3.066 (2004)
Surfatscha	90 km2
Spessezza	34,07 ab/km2 (2004)
Autezza	1.298 m
Fracziuns	Ordino, Sornàs, Ansalonga, la Cortinada, Llorts
Coordinatas	42° 33′ n, 1° 32′ o
Numer postal	AD300
Website	www.ordino.ad

Ordino è tenor l'urden tradiziunal la terza da las sis parròquies da l'Andorra. Cun ina surfatscha da 90 km² è ella suenter Canillo la parròquia la pli extendida. La parròquia cumprenda l'intschess dal flum Valira d'Ordino u Valira del Nord, en il nordvest dal Principadi. Ella cunfina en il nord cun il País de Faix (Auzat e Vic de Sòs), en l'ost cun Canillo ed en il vest cun la Massana.

Tenor la dumbraziun dal pievel dal 2001 dumbrava la vischnanca en quest onn 2.366 citadins registrads. Administrativamain è ella dividida en tschintg quartiers che disponan da cussegls propris: Ordino, Sornàs, Ansalonga, la Cortinada i Llorts.

Istorgia

Istoricamain è Ordino sa distinguì per sias fuschinas, spezialmain la Fuschina d'El Serrat e la Fuschina da l'Areny. La serrada da l'ultima fuschina a la fin dal 19 tschientaner ha provotgà ina diminuziun da la populaziun. L'onn 1983 è il territori da skis Ordino-Arcalís vegnì avert.

Ordino n'è betg sulettamain il center industrial istoric, ma era il center cultural da l'Andorra. Qua è il Manual Digest, numnà la "bibla andorrana", vegnì scrit. El tracta da l'istorgia, il guvern ed ils usits da l'Andorra.

Las attracziuns las pli impurtantas èn la baselgia parochiala "Sants Corneli i Cebrià" cun dus maletgs da Nossadunna romanics dal 12avel e 13avel tschientaner; la baselgia romanica "Sant Martí de la Cortinada" cun picturas muralas dal 12avel tschientaner; las chasas fortifitgadas da Fiter-Riba, nua ch'ins po guardar l'original dal Manual Digest, e dad Areny-Plandolit, la famiglia-proprietaria da la Fuschina da l'Areny, ch'è vegnida transfurmada en in museum.