Acla

Ord Wikipedia
Jump to navigation Jump to search
Acla enviern 2005
Acla stad 2006

Acla è in vitg che tutga tar la vischnanca da Medel/Lucmagn en il chantun Grischun. Acla giascha sin 1477 meters sur mar. Pervi dal privel da lavinas n'è Acla davent da l'onn 1975 betg pli abità durant l'entir onn. Las chasas ch'èn betg vegnidas destruidas lez onn da la lavina èn ussa chasas da vacanzas.

Geografia[modifitgar | modifitgar il code]

Acla è l'ultim vitg en la Val Medel avant che cuntanscher il Pass dal Lucmagn. Il vitg sa chatta da vart sanestra dal Rein Miez. La via chantunala maina da l'autra vart sper il vitg ora.

Ord l'istorgia[modifitgar | modifitgar il code]

Dal vitg dad Acla datti mo paucas infurmaziuns a scrit. Ord ils paucs documents ch'i dat che pertutgan la chaplutta dal vitg san ins concluder ch'il vitg existiva gia avant 1600. Acla era in vitg da purs. Mintga famiglia aveva in per paucs tiers gronds ni almain intginas chauras u nursas. Mintga zichel prà vegniva tratg a niz. Enturn l'onn 1850 stueva Acla avair blers abitants. Vischins pli vegls han raquintan ch'il vitg dumbravi 12 fin 13 famiglias cun circa 90 abitants. Da quai eran var 20 uffants da scola. Ins vuleva da quai temp schizunt fundar ina atgna chaplania. L'uvestgieu da Cuira n'haja però betg lubì quai. Persuenter hajan ils vischins dastgà disfar la chaplutta e bajegiar ina nova. La gronda part da la lavur è vegnida fatga en lavur cumina. Ils custs da la chaplutta nova han muntà a 970 francs.

Lavina[modifitgar | modifitgar il code]

Ils 6 d'avrigl 1975 è la chaplutta ed il vitg vegnì destruids da lavinas. Trais persunas han pers la vita tar quella catastrofa. Ils abitants d'Acla han stuì bandunar lur vitg e sa chasar da nov a Fuorns, il vitg vischinant. L'atun 1977 han ils abitants pudì entrar en lur novas chasas a Fuorns ed il muvel en ina nova stalla communabla. Sulettamain duas chasas n'ha la lavina betg destruì. Duas autras chasas han ins puspè sanà. Ellas servan oz sco chasas da vacanzas. Era èsi vegnì bajegià ina nova chaplutta. La chaplutta da Son Giachen che la lavina ha destruì datava tenor vegls documents da l'onn 1850. Dapi l'onn 1979 paradescha en il medem lieu la nova chaplutta cun ina furma moderna. Sin il crest è ella bain vesaivla per mintgin che charrescha tras la val. Sin il mir da la chaplutta stat l'inscripziun «Pertgei temer, sepanzar? La via cun tei va il Christus Signur.»

Funtauna[modifitgar | modifitgar il code]

Cudesch "Val Medel" da Clemens Pally e conauturs

Colliaziuns[modifitgar | modifitgar il code]

Pagina da la vischnanca da Medel/Lucmagn