Bianca Mayer

Ord Wikipedia
Questa pagina è scritta en vallader.
Bianca Mayer alias Bibi Vaplan, 2012.

Bianca Mayer (* 17. mai 1979 a Scuol) es üna musicra rumantscha. Sco chantadura lavur'la suot il pseudonim Bibi Vaplan.

Vita[modifitgar | modifitgar il code]

Bianca Mayer es nada a Scuol dal 1979 e creschiva sü in üna famiglia musicala. Seis bap Reto Mayer d'eira musicant popular e dirigent.[1][2]

Bianca Mayer ha stübgià clavazin classic a la Scoula ota zürigaisa dals arts ed ha tut eir cuors da jazz dürant quel temp.[3]

Dal 2008 es ella tuornada in Engiadina, ha vivü fin il 2012 ad Ardez e lavurà pro la Scoula da musica Engiadina Bassa / Val Müstair.[2]

Dal 2012 fin 2014 ha ella lavurà sco moderatura al Radio Rumantsch a Cuoira.[1]

Daspö il 2014 lavura Bianca Mayer sco musicista independenta suot il nom Bibi Vaplan.

Musica[modifitgar | modifitgar il code]

Musica da film e teater[modifitgar | modifitgar il code]

Daspö 2003 scriva Bianca Mayer cumposiziuns per teaters e films, desch progets pür dal 2004 fin il 2008. Ella ha assisti da cumpuoner il soundtrack dal film Vitus da Fredi Murer (2005), il soundtrack dad I was a Swiss Banker da Thomas Imbach (2007) sco eir quel da Happy New Year da Christoph Schaub (2008).[4][2]

Alba da la Clozza[modifitgar | modifitgar il code]

Davo il stüdi e fin 2009 d'eira Bianca Mayer chantadura da rock aint illa gruppa Alba da la Clozza, provocativa, cun chavels cuorts e blondats, sunond la guitarra da jazz.[1]

Bibi Vaplan[modifitgar | modifitgar il code]

Daspö il 2010 sviluppaiva Bianca Mayer ün stil da musica plü quiet e pensiv.[5] Ella cumanzaiva a publichar sia musica suot il pseudonim Bibi Vaplan, ün nom chi dess esser program (Bianca, va plan!). Sco Bibi Vaplan scriv'la ils texts e la musica, chanta e suna il clavazin o eir il cembalo.[1] L'album Sdruagliar dals 2012 es üna collavuraziun culla Kammerphilharmonie Grischun.[5][6]

Las chanzuns da Bianca Mayer sun adüna per vallader.[1] Sur dal motiv persunal da far musica disch la chantautura:

«La musica am güda da mütschir, d'incleger, sentir o da chattar darcheu il fuond suot ils peis cur ch'eu am perd aint in alch. Sch'eu füss cuntaintischma, nu stessa far musica, lura gessi a baiver ün caffe cun meis amis.»

Posta Ladina, als 15 november 2012

Discografia[modifitgar | modifitgar il code]

  • Üna jada intuorn sco Alba da la Clozza, 2009.
  • Ingio vasch? sco Bibi Vaplan, 2011.
  • Eu vegn cun tai sco Bibi Vaplan, 2011.
  • Sdruogliar sco Bibi Vaplan, 2012.
  • Cul vent sco Bibi Vaplan, 2015.
  • Cler Cler sco Bibi Vaplan, 2018.

Premi[modifitgar | modifitgar il code]

  • 2009 premi da promoziun dal chantun Grischun[4]
  • 2014 premi per lavur proffessiunala chantun Grischun
  • 2015 premi per lavur proffessiunala chantun Grischun
  • 2018 1.premi «Charta d'amur» Aris Verlag
  • 2019 premi da promoziun dal chantun Zug
  • 2019 Nominaziun musicista da l'on (Bündner Music Awards)
  • 2019 Nominaziun Swiss Live Talents «National Language»

Colliaziuns[modifitgar | modifitgar il code]

Indicaziuns da las funtanas[modifitgar | modifitgar il code]

  1. 1,0 1,1 1,2 1,3 1,4 Schweizer Radio und Fernsehen, emissiun Kulturplatz dals 17. lügl 2013. Visita als 2. settember 2013.
  2. 2,0 2,1 2,2 Cuors da la vita, inedi, com. pers. als 3. settember 2013.
  3. Biografia sün mx3 (The Swiss Music Portal). Visita als 2. settember 2013.
  4. 4,0 4,1 Radiotelevisiun Svizra Rumantscha: emissiun da 2009. Visita als 2. settember 2013.
  5. 5,0 5,1 Artichel da la Posta Ladina als 15 november 2012. Visita als 2. settember 2013.
  6. Infuormaziun biografica pro Giuventüna Rumantscha. Visita als 2. settember 2013.