Bibliografia retorumantscha
La Bibliografia retorumantscha (1552–1984) e Bibliografia da la musica vocala retorumantscha (1661–1984) è cumparida l'onn 1986 cun la finamira da dar ina survista integrala da tut las scrittiras stampadas dal Grischun rumantsch tranter il 1552 ed il 1984 sco era da la musica vocala rumantscha dals onns 1661 fin 1984. Ella è vegnida cumpilada da Norbert Berther ed Ines Gartmann ed edida da la Lia Rumantscha cun sustegn dal Chantun.[1] Las duas ovras bibliograficas èn unidas en in tom da 1200 paginas.[2]
La Bibliografia cuntegna registers dals auturs, dals nums, dals lieus geografics, da las materias, da cumponists ed arranschaders, dals titels e dals incipits da la chanzuns ed auters. Las introducziun ed instrucziuns da diever èn scrittas en rumantsch, tudestg e talian.[2]
L'ovra sa drizza oravant tut a persunas che han in interess scientific vi dal rumantsch, sco linguists, istorichers, etnologs, sociologs e perscrutaders da musica. Ultra da quai a bibliotecas, instituts universitars, uffizis da redacziun, uffizis da documentaziun e schurnalists.[2]
Referenzas
[modifitgar | modifitgar il code]- ↑ Ludger Syré, Heidrun Wiesenmüller (Hrsg.): Die Regionalbibliographie im digitalen Zeitalter. Deutschland und seine Nachbarländer. Sonderband 90 da la retscha Zeitschrift für Bibliothekswesen und Bibliographie. Vittorio Klostermann. Frankfurt am Main 20061, p. 87 (prevista tar Google Books)
- ↑ 2,0 2,1 2,2 rcb: Ina nova Bibliografia retorumantscha (1552–1984). En: Terra Grischuna. 4, avust 1986, p. 81 (Pagina rumantscha)