Brenno
Il Brenno è in flum da var 35 km lunghezza en il chantun Tessin en Svizra. El traversa la Val dal Blegn en direcziun principalmain meridiunala e sbucca sper Biasca en il Ticino.
En ils dialects lumbard-tessinais da ses intschess vegn il Brenno numnà ‹Tessin/Ticino›. A Biasca din ins Tesin de Bregn[1] (pronunzià [te'ziɲ dɛt'brɛɲ]), en auters parts simplamain Tesin (pronunzià [ul ta'ziŋ] ad Olivone).[2]
Curs
[modifitgar | modifitgar il code]Il flum da funtauna principal dal Brenno nascha sut il Piz Medel sper il Pass Crap (Greina). El percurra la Val Camadra, prenda si il scul dal lai da fermada Lago di Luzzone e s'unescha en la foppa d'Olivone cun il Brenno di Santa Maria che cula giu dal Pass dal Lucmagn. En il curs inferiur – tranter Malvaglia ed il cugn da bova Buzza di Biasca – sa mussa il Brenno fermamain selvadi. Ils sediments da crappugl dal Brenno e ses affluents da sanestra Orino e Lesgiüna cuvran là l'entira vastadad dal fund da la val.
Annotaziuns
[modifitgar | modifitgar il code]- ↑ Ottavio Lurati, Nomi di luoghi e famiglie e i loro perché?... Lombardia-Svizzera-Piemonte, Varese, Pietro Macchione ed., 2011
- ↑ NavigAIS, carta numer 4
| |||||
