Cristianissem
|
Questa pagina è scritta en puter. Igl exista er in artitgel davart il medem tema en rumantsch grischun. |
Il cristianissem es la pü granda religiun universela cun var 2,3 milliards commembers sül muond inter.
Classificaziun
[modifitgar | modifitgar il code]Insembel cun giudaissem, la sour pü veglia, e cun l'islam, chi apparaiva pü tard, es il cristianissem üna religiun monoteistica caracteriseda da la cretta be in ün unic Dieu. Quistas trais religiuns fuorman la gruppa da las religiuns abrahamiticas chi integreschan ad Abraham in lur istorgias da fundaziun.
Il cristianissem es üna religiun missiunarica chi's drizza zieva il cumand da Gesu da Nazaret da fer deraser sieu evangeli fin als cunfins dal muond e suot tuots pövels.
Doctrina
[modifitgar | modifitgar il code]I'l center da la cretta da tuottas confessiuns differentas infra il cristianissem sto la persuna da Gesu. El vain onuro scu il salveder chi ho chaschuno il reconciliamaint traunter Dieu e'ls umauns in forza da sia vita, da sia paschiun, da sia mort sülla crusch ed in vigur da sia resüstaunza dals morts zieva trais dis.
Gesu es medemmamaing vair umaun e vair Dieu. Scu l'ultim piglia'l part a la trinited divina insembel cun sieu bap celestiel e cul spiert sench.
Derasaziun
[modifitgar | modifitgar il code]Il cristianissem es preschaint in tuots pajais dapertuot sün tuot il muond. In Europa, in America da Süd e da Nord, in Africa centrela e da Süd, süllas filippinas ed in Australia es la granda part da la populaziun tradiziunelmaing cristiauna. Ün stedi greiv ho'l cristianissem in bod tuots pajais islamics ed in Corea da Nord. Cu vegnan crettaivels dischavantagios, oppress u perseguitos.
Confessiuns
[modifitgar | modifitgar il code]Il cristianissem as parta in bgeras confessiuns, da las quêlas sun las pü importantas la baselgia catolica romauna in Europa da Süd (il papa domicilo i'l Vatican) e sül continent americauna latina, las baselgias ortodoxas in Europa d'Ost ed illa part asiata da Russia e'l protestantissem in Europa centrela e da Nord ed in America da Nord.