Dis da litteratura Domat
Ils Dis da litteratura èn ina occurenza annuala da la ULR, l'Uniun per la litteratura rumantscha. Quels dis han lieu davent da l'onn 1990 mintg'onn a Domat en la sala Tircal.
Mintg'onn sa preschentan auturs ed auturas rumantschas durant quels dis cun lur ovras. Ils dis da litteratura èn ina buna plattafurma per la preschentaziun da novas ovras. Dasper quai vegn mintg’onn organisà in spezial program cultural cun musica, teater u film. Pel solit èn reservadas la sonda e la dumengia per la litteratura, durant ch'il program da la saira integrescha era autras furmas culturalas (musica, teater, cabaret). Mintg'onn vegn cuntanschì pli u main in grond public entaifer ed ordaifer il Grischun cun in program tenor in tema che pertutga la Rumantschia. Il comité dals Dis da litteratura emprova explicitamain da crear in'identitad culturala rumantscha.
Il comité d'organisaziun sefurma ord tschintg giuvens rumantschs che lavuran sin basa voluntara per promover la litteratura rumantscha. L‘organisaziun tetgala è la ULR. Il comité gauda dentant tut las libertads ma era la responsabladad pertutgand il program, l‘organisaziun, la realisaziun e la finanziaziun dals Dis da litteratura.
Als Dis da Litteratura vegn il premi da litteratura Term Bel surdà entras la vischnaunca burgaisa da Domat. Quai premi es numnà tenor in lieu sin territori da la vischnaunca da Domat, la tegia da Domat che porta quest num es situada sin 1964 m.s.M.
Pagina en la rait
[modifitgar | modifitgar il code]- Dis da Litteratura cun il program actual. Quella pagina nova es vegnida publitgada egl onn 2016.