Gian Pitschen Balastèr

Ord Wikipedia

Gian Pitschen Balastèr (* 1833 a Zuoz; † 1894 a Zuoz) è stà in poet rumantsch.

Vita ed ovra[modifitgar | modifitgar il code]

Gian Pitschen Balastèr è naschì l'onn 1833 a Zuoz, nua ch'el ha passentà sia giuventetgna e frequentà la scola. Ses magister Gian Tumesch Gredig l'ha probablamain dà ils emprims impuls poetics. Cun sedesch onns è el partì per l'Italia sco ‹giuven d'buttia›. Cun pitschnas interrupziuns è el stà là fin il 1879, l'emprim a Capri, suenter a Reggio Emilia e Modena, nua ch'el ha surpiglià la direcziun d'in affar. Il 1868 ha el maridà Margerita Bernhard cun la quala el aveva tschintg uffants. Pliras da sias poesias ha el scrit en Italia, tranter auter «O mia chera Engiadina», ina chanzun da grond'encreschadetgna per sia patria.

L'onn 1879 è Balastèr sa stabilì a Zuoz, nua ch'el ha occupà diversas caricas communalas. Uschè è el per exempel stà president communal. En ses temp liber è el ì a chatscha. Il prinzipi dal 1894 è Gian Pitschen Balastèr mort en la vegliadetgna da 60 onns suenter lunga malsogna. Il settember 1893 ha el publitgà si'ultima poesia «Il nouv schluppet».

Las poesias da Gian Pitschen Balastèr èn cumparidas da ses temp en il Fögl d'Engiadina ed il 1905 las ha Johann Ulrich Campell publitgadas en las Annalas da la Societad Retorumantscha, accumpagnadas d'ina curta biografia.

Referenzas[modifitgar | modifitgar il code]

  • Johann Ulrich Campell: [Prefaziun a las poesias da Gian Pitschen Balastèr (1833 - 1894).] En: Annalas 19 (1905), p. 105–107 (online)
  • Peider Lansel: Musa ladina. Antologia da la poesia engiadinaisa moderna, precedüda d'üna cuorta survista da nossa litteratura poetica. Engadin Press, Samedan 1910.