Giancarlo Antognoni

Questa pagina è scritta en puter.

Giancarlo Antognoni (* Marsciano, 1. avrigl 1954) es ün ex-ballapeist taliaun, giuveder dal center dal champ. Dal 1982 ho'l guadagno il champiunedi mundiel cun la squedra naziunela da ballapè da l'Italia. El ho spais tuot sia carriera taliauna da ballapeist da professiun in l'ACF Fiorentina duraunt ils decennis Settaunta ed Ochaunta dal 20. tschientiner.

Carriera scu ballapeist

In squedras da club

Antognoni giuvaiva già a 16 ans in ün'equipa da Serie D taliauna, l'Asti Ma.Co.Bi.; düraunt sieu prüm champiunedi (1970/71) fet el 6 matschs, ma già la stagiun zieva giuvaiva'l fich suvenz dal cumanzamaint da la partida.

L'ACF Fiorentina, squedra da Serie A, cumpret Antognoni dal 1972; il giuven giuveder debütet cun sia nouva equipa als 15 october 1972 i'l matsch Hellas Verona-ACF Fiorentina, vint da la Viola da Firenza 2-1: Antognoni giuvet culla maglia numer 7. In seguit dvantet Antognoni il leader da l'equipa da Firenza, da la quêla vstit la maglia numer 10 düraunt quindesch ans e füt püssas voutas il chapitauni.

Dal 1981 pervi d'ün accidaint da gö cul goli dal Genoa CFC Silvano Martina as rumpet Antognoni il cupigliun; sieu fled as fermet, e'l giuveder cumanzet darcho a respirer be grazcha a l'agüd da meidis e massörs da las duos squedras. Zieva trais ans vet el ün oter accidaint cun Luca Pellegrini da l'UC Sampdoria (l'otra equipa da Genua: quasi ün spass dal destin), chi provochet la fractura da l'üss dal vantrigl. Zieva sieu seguond accidaint, schabain ch'Antognoni füss guarieu, faiva il treneder da la Fiorentina Aldo Agroppi giuver suvenz Roberto Onorati impè dad el; per que ün di gnit Agroppi assaglieu dad ün pêr fans.

Antognoni abandunet Firenza a fin champiunedi 1986/87: düraunt 15 stagiuns culla Viola ho'l piglio part a 341 matschs, fat 61 gols e guadagno ün Coppa Italia (1974/75) ed üna Coppa da Liga Italo-inglais (1975/76). Zieva get el a Losanna, inua ch'el giuvet illa squedra dal lö düraunt duos ans.

Als 25 avrigl 1987 glivret el da giuver. Sia "partida d'adieu" füt ün matsch da beneficenza traunter la naziunela taliauna champiun dal muond 1982 ed üna squedra internaziunela furmeda dals meglders ballapeists; a la partida, giuveda i'l stadion "Artemio Franchi" da Firenza, pigliettan part 40.000 spectatuors.

Illa squedra naziunela

Antognoni ho giuvo 73 voutas illa squedra naziunela da ballapè da l'Italia ed ho fat 7 gols. Sieu prüm matsch füt Pajais Bass-Italia 3-1 als 20 november 1974, l'ultim füt Tschecoslovachia-Italia als 16 november 1983.

El ho piglio part duos voutas al champiunedi mundiel da ballapè: dal 1978 in Argentina e dal 1982 in Spagna, inua ch'el vaindschet il turnier eir sch'el nu giuvet il finel pervi d'ün accidaint.

Carriera scu mneder

Zieva avair glivro sia carriera scu ballapeist, dvantet Antognoni ün dals mneders da la Fiorentina. Illas ultimas partidas dal champiunedi 1992/93 substituit el il treneder Aldo Agroppi insembel cun Luciano Chiarugi, ma tuottüna get la squedra Viola in Serie B.

Antognoni restet tar l'amministraziun da la Fiorentina fin 2001; zieva vet el ün incharg da mneder pellas squedras naziunelas da giuvens da l'Italia.

Statisticas

Clubs

1970-1972 AC Asti Ma.Co.Bi: 27 partidas, 4 gols
1972-1987 ACF Fiorentina: 341 partidas, 67 gols
1987-1989 FC Lausanne-Sport: 33 partidas, 5 gols

Naziunelas

1973 Italia Under-21: 1 partida, 0 gols
1974-1983 Italia: 73 partidas, 7 gols

Premis

1974/75: Coppa Italia cun l'ACF Fiorentina
1975/76: Coppa da Liga Italo-inglaisa cun l'ACF Fiorentina
1982: Champiunedi mundiel da ballapè cun l'Italia
2010: Premi Golden Foot ("Pè d'or") per sia carriera

Oters progets

Commons

Commons: Giancarlo Antognoni – Collecziun da maletgs, videos e datotecas d'audio