ACF Fiorentina

Ord Wikipedia
Questa pagina è scritta en puter.
Bindera da la Fiorentina
Trikotfarben
Trikotfarben
Trikotfarben
Trikotfarben
Trikotfarben
Trikotfarben
Trikotfarben
Trikotfarben
Maglia da la Fiorentina

L'ACF Fiorentina (da pü bod: 1926-1927 Associazione Calcio Firenze, 1927-2002 Associazione Calcio Fiorentina, 2002-2003 Florentia Viola) es ün'equipa taliauna da ballapè. Ella giova sias partidas da chesa a Firenza, i'l stadion "Artemio Franchi" (45.809 spectatuors) ed actuelmaing piglia part a la Serie A, la liga taliauna la pü ota.

Istorgia[modifitgar | modifitgar il code]

Il principi[modifitgar | modifitgar il code]

Giuveders da la Fiorentina dal 1926 culla maglia alva e cotschna

La Fiorentina as furmet als 26 avuost 1926 da la fusiun traunter il Club Sportivo Firenze e la secziun da ballapè da la Polisportiva Giovanile Libertas; Las culuors da la nouva societed eiran alv e cotschen. Il prüm matsch uffiziel vet lö als 22 september 1926 in occasiun d'ün gö amical cunter l'AS Roma; in quella partida pella prüma vouta druvet la Fiorentina la maglia violetta, sülla quela eira rachameda la gilgia, flur cuntgnida illa vappa da Firenza: tuot que procuret in seguit a la squedra ils surnoms la Viola ("la Violetta") ed i Gigliati ("Quels da la gilgia"), chi vegnan druvos eir hoz per identificher la Fiorentina.

La Fiorentina pigliet part al champiunedi da Serie B (la seguonda liga taliauna da ballapè) pella prüma vouta illa stagiun 1929/30, ch'ella glivret a la quarta plazza. Ella guadagnet la Serie B la stagiun seguainta e cun que gnit promovida per la Serie A. Dal 13 settembre 1931 gnit inauguro il nouv "Stadio Comunale" (il nom dal quêl gnit müdo pü tard in "Stadio Artemio Franchi") cun üna partida cunter l'Admira Vienna. Cun que eira la Fiorentina pronta per sieu prüm champiunedi da Serie A eir in quist reguard.

Düraunt ils ans seguaints as tgnet'la fich bain: il meglder plazzamaint füt il terz rang obtgnieu i'l champiunedi 1935/36; tuottüna a fin stagiun 1937/38 gnit'la relegeda in Serie B.

Il prüm success[modifitgar | modifitgar il code]

Illa stagiun 1939/40, dalum turneda in Serie A, ragiundschet la Fiorentina la 12. plazza: ella vaiva 24 puncts scu AC Liguria e Napel, ma restet in Serie A pella megldra differenza da gols. Siand cha la Fiorentina mantgnet la Serie A be cun furtüna, guadagnet'la scu outsidra la Coppa Italia 1939/40. Il finel gnit giuvo als 15 gün 1940 a Firenza cunter il Genoa: la Viola vaindschet 1-0 grazcha ad ün gol da Mario Celoria fat al 26. minüt.

Il prüm Scudetto - Montuori e l'"Era Hamrin"[modifitgar | modifitgar il code]

Kurt Hamrin

Illa stagiun 1955/56 guadagnet la Fiorentina sieu prüm Scudetto. Il president da quel temp, l'industriel Enrico Befani, e'l treneder Fulvio Bernardini fettan üna squedra fich ferma. Il gö offensiv da la Fiorentina gnit fich amegldro pustüt da l'attacheder argentin Miguel Montuori e dal brasiliaun Julinho, stimo da Bernardini scu la megldra ela dretta dal muond. Düraunt tuot il champiunedi perdet la squedra be l'ultima partida, 1-3 cunter il Genoa.

Zieva sieu prüm Scudetto as classifichet la Fiorentina scu seguonda mincha champiunedi fin 1960.

Dal 1957 ragiundschet la Fiorentina il finel da la Coppa dals Champiuns d'Europa, cha tuottüna perdet 2-0 cunter il Real Madrid.

Davent dal champiunedi 1958/59 giuvet illa Fiorentina l'attacheder svedais Kurt Hamrin, chi restet culla Viola fin 1967; cun 151 gols in 289 partidas fet el ün record da club chi gnit amegldro da Gabriel Batistuta be zieva püssas decennis.

Zieva avair pers ils finels dal 1958 e 1960, dal 1961 guadagnet la Fiorentina darcho la Coppa Italia. Impü dal 1961 guadagnet'la la Cuppa dals Vaindscheders da Coppas cunter Glasgow Rangers. L'an zieva ragiundschet il finel da listessa Coppa, ma'l perdet cunter l'Atlético Madrid.

Oters success e successiv declin[modifitgar | modifitgar il code]

La stagiun 1968/69 glivret cul guadagn dal seguond Scudetto. Zieva la partenza da giuveders importants (scu'l goli da la squedra naziunela taliauna Enrico Albertosi), al cumanzamaint dal champiunedi eira l'equipa insè stimeda scu na particulermaing ferma; tuottüna fet'la ün pitschen "miracul": ella perdet be üna partida (1-3 a chesa cunter il Bologna) e guadagnet il champiunedi sainza sconfittas d'utrò.

La Fiorentina guadagnet sia quarta Coppa Italia dal 1975. Tuottüna l'an zieva perdet già in l'ochevel finel da la Coppa dals Vaindscheders da Coppas cunter l'equipa tudas-cha orientela Sachsenring Zwickau.

La perioda dals grands success eira glivreda definitivamaing: düraunt ils ans seguaints ragiundschet la Fiorentina quasi adüna auncha rangs d'üna cifra, ma vairs success nu gnittan, e zieva quatter ans suot la media gnit'la relegeda in Serie B a fin stagiun 1992/93.

L'"Era Cecchi Gori" e Batistuta[modifitgar | modifitgar il code]

Gabriel Batistuta

La relegaziun dal 1993 füt uschè surprendenta ed inaspetteda scu'l guadagn dal champiunedi 1968/69, perque cha l'equipa disponiva d'ün potenziel fich grand, chi faiva crajer d'esser capabel da fer üna stagiun megldra cu quellas dals ultims ans: nempe illa squedra giuvaivan - traunter oter - Stefan Effenberg, Brian Laudrup, Francesco Baiano e pustüt Gabriel Batistuta.

Dal 1993 dvantet Vittorio Cecchi Gori, producent da films, president da la Fiorentina impè da sieu bap Mario, mort dandettamaing. Cun sieas metodas na incuntestabels vaiva'l ambiziun e mezs finanziels per fer dvanter darcho la Fiorentina ün club cun success.

La part fondamentela da la squedra relegeda in Serie B gnit tgnida e cumpletteda cun giuvens talents, uschè cha la Fiorentina, treneda da Claudio Ranieri, gnit dalum promovida in Serie A.

Düraunt la stagiun seguainta dvantet Batistuta il champiun da gols da Serie A cun 26 gols e ragiundschet la Fiorentina la deschevla plazza. In tuot fet Batistuta culla Viola 168 gols (152 in Serie A e 16 in Serie B) e cun que surpasset il vegl record da Hamrin.

Già illa stagiun 1995/96 guadagnet l'equipa sia quinta Coppa Italia in battand in finel l'Atalanta Bergam 1-0 a Firenza e 2-0 a Bergam. Cun quecò as qualifichet'la pella Supercoppa taliauna, ch'ella giuvet cunter l'AC Milan, equipa champiunessa d'Italia. La coppa gnit guadagnet da la Viola, chi vaindschet il matsch a Milaun 2-1.

Ils champiunedis seguaints gnittan caraterisos da sforzs per rinfurzer inavaunt l'equipa; que chaschunet però eir qualche cumpra sbaglieda - memma precipiteda e chera - ed üna politica finanziela ruinusa, chi pü tard vess pudieu mner auncha üna vouta a noschas consequenzas.

La terza plazza ragiunta i'l champiunedi 1998/99 det il dret a la Fiorentina da piglier part a la Champions League però be üna vouta, ed illa stagiun 2000/01 guadagnet'la sia sesta Coppa Italia.

Il concuors e la nouva fundaziun[modifitgar | modifitgar il code]

Christian Riganò

Üna prüma melcuntantezza füt la partenza da Batistuta, chi get a l'AS Roma zieva la fin dal champiunedi 1999/2000.

In avuost 2000 manchantet la Fiorentina inaspettatamaing la qualificaziun a la Champions League cunter l'equipa outsidra Helsingborgs IF: ils svedais vaindschettan 1-0 il gö a chesa ed il seguond gö glivret sainza gols. Cun que get la Fiorentina be in Coppa UEFA; la Viola gnit battida già illa prüma partida cunter la squedra austriaca FC Tirol (1-3 il prüm gö, 2-2 il seguond). Pervi da quests insuccess illa stagiun 2000/01 manchettan a la Fiorentina las entredgias calculedas pella partecipaziun a concurrenzas internaziunelas: cun que eira deda sia via vers il concuors.

Problems relevants - na dal tuot inaspettos - cumparittan a mited 2001, cur cha la situaziun finanziela nu lubiva pü a pajer ils salaris dals giuveders ed a servir seguond uorden obligaziund da var $ 50.000.000. Vittorio Cecchi Gori as det fadia bainschi d'investir oters raps per la squedra, ma nu pudetcreer üngüna basa finanziela sufficiainta. Ma Cecchi Gori a la fin finela eira considero da la pü granda part dals fans d'esser sto insomma be la cuolpa da la crisa, que chi culminet als 18 avrigl 2002 in üna demonstraziun a Firenza cunter il president cun 30.000 partecipants. A fin champiunedi gnit la Fiorentina relegeda in Serie B; zieva gnit sia licenza piglieda davent, e la Fiorentina gnit missa suot administraziun güdiziela. Pervi da l'insolvenza nu pudet la squedra niauncha cumanzer la Serie B: a la fin finela gnit il club danövmaing furmo cul nom Florentia Viola. Il nouv proprietari, Diego Della Valle (fabricant da s-charpas) rivet a permetter la partecipaziun da l'equipa a la Serie C2 (la quarta liga taliauna da ballapè), schabain cha que nu füss previs il prüm i'l reglemaint e cha las prescripziuns vessan dicto la cupicha i'ls champiunedis dals amatuors.

L'equipa füt steda buna da dominer da maniera suverauna la Serie C2; champiun da gols füt Christian Riganò cun 30 gols, e cun que gnit la squedra promovida in Serie C1 (la terza liga taliauna da ballapè).

Culla recumpra dal vegl nom dal club (e da sieus tituls) davart da Della Valle, pudet la Fiorentina giuver directamaing in Serie B, sainza stuvair fer la Serie C1: la F.I.G.C. (la Federaziun taliauna da ballapè) vaiva augmanto il numer dals clubs da Serie B da 20 a 24 cun üna decisiun cuntesteda, uschè ch'a nu det pü üngün intop. Tuottüna chaschunet la dobla promoziun dispüttas relevantas, pustüt davart da las equipas pü pitschnas, chi vzaivan in quista favorisaziun da clubs cun granda aderenza üna distorsiun da concurrenza.

Eir per la Fiorentina svessa nu füt la decisiun dal tuot sainza problems, siand cha in quel mumaint eira la preparaziun pella Serie C1 già pü u main glivreda e dimena stuvaiva la squedra gnir rinfurzeda adequatamaing. Ma cun bger dun d'improvisaziun füttan treneder e direcziun dal club buns a furmer üna pussaunta squedra pella Serie B, ed illa stagiun 2003/04 - darcho auncha grazcha als numerus gols da Riganò - ragiundschet la Fiorentina la sesevla plazza, chi daiva il dret da giuver ün matsch cunter la squedra al 15. rang da Serie A per avair üna plazza i'l seguaint champiunedi da la liga la pü ota. La Viola vaindschet cunter l'AC Perugia (1-0 il prüm gö a Perugia, 1-1 il seguond a Firenza), e cun que turnet l'equipa darcho in Serie A, illa quela i'l champiunedi 2004/05 grataget'la a mantgnair la categoria be a l'ultim matsch.

La Fiorentina glivret il champiunedi 2005/06 cun surpraisa culla quarta plazza da Serie A e culla qualificaziun a la Champions League, na scu ultim grazcha a l'excellent attacheder Luca Toni, chi dvantet il champiun da gols da Serie A cun 31 gols.

Svilup actuel[modifitgar | modifitgar il code]

Luca Toni

Zieva la fin da la stagiun 2005/06 antivet la Fiorentina i'l buogl dal s-chandel i'l quel gnit stratta aint la Juventus Turin. Diego Della Valle e sieu frer Andrea vaivan resistieu per lönch a l'uschè dit "Sistem Moggi", ma tuottüna a la fin finela illa stagiun 2004/05 s'arrandschettane cun que pe impedir üna relegaziun quella vouta imminenta. Zieva cha la Fiorentina gnit il prüm proclameda relegeda ufficielmaing in Serie B, illa sentenzcha d'appellaziun gnit'la cundamneda ad üna reducziun da 19 puncts pella stagiun seguainta, ma pudet rester in Serie A. Impü illa stagiun 2006/07 nu pudet'la piglier part ad üngüna concurrenza internaziunela, perque ch'oters 30 puncts la gnittan subtrahos retroactivamaing pella stagiun passeda. Pünavaunt nu pudettan ils frers Andrea e Diego Della Valle avair funcziuns uffizielas illa ballapè taliauna per trais ans resp. trais ans e nouv mais. Als 27 october 2006 diminuit il tribunel da cumpromiss dal C.O.N.I. (il Comitè olimpic naziunel taliaun), scu ultima instanza d'appellaziun, la reducziun da puncts da 19 a 15 pella stagiun currainta.

Correspundantamaing greivas paraivan las perspectivas pel champiunedi 2006/07; tuottüna grataget la Fiorentina a tgnair Luca Toni, e l'expert treneder Cesare Prandelli, chi vaiva fat già illa stagiun precedainta üna excellenta lavur a Firenza, det l'attacha a la missiun cun üna squedra fich motiveda. Già a l'8. matsch gnit la reducziun da puncts egualiseda ed al 15. bandunet la Fiorentina ils rangs da relegaziun. Al cumanzamaint da dicember 2011 guadagnet Cesare Prandelli il premi "Treneder da l'an".

A la fin da la prüma runda, als 14 schner 2007, as chattaiva la Fiorentina a la 14. plazza, in contact cul center da la glista da rangs e cun set puncts da distanza da la zona da relegaziun: sainza la reducziun da 15 puncts füss la Viola steda a la quarta plazza in quel mumaint.

A fin champiunedi ragiundschet la Fiorentina la quinta plazza, chi la daiva il dret a piglier part a la Coppa UEFA. Cun be 31 gols piglios düraunt 38 matschs disponet'la da la megldra defaisa da la Serie A; sainza la reducziun da puncts füss'la steda a la terza plazza.

Zieva la partenza da Luca Toni vers il Bayern Minca, illa stagiun 2007/08 nu currespundet la Fiorentina dal tuot a las aspettativas, chi sainza dubi eiran fich otas; almain gnittan ragiunts il quart finel da Coppa Italia (duos voutas 1-2 cunter Lazio Roma e dafatta il semifinel da Coppa UEFA (0-0 e 2-4 cunter Glasgow Rangers). La quarta plazza ragiunta in Serie A la det il dret da piglier part als güs da qualificaziun da la Champions League; la Viola ragiundschet la fasa a gruppas da la coppa in vaindschand cunter Slavia Prag (2-0 a chesa, 0-0 d'utrò).

Eir i'l champiunedi 2008/09 nu currespundet la Fiorentina a las aspettativas da sieus fans; tuottüna ragiundschet'la darcho la quarta plazza in Serie A. Da l'otra vart gnittan sieus fans dischillus tres eliminaziuns premadüras in Coppa Italia ed i'ls gös da qualificaziun da Champions League e tres la sconfitta in semifinel da Coppa UEFA cunter Ajax Amsterdam.

Als 24 settembre 2009 demischiunet il president Andrea Della Valle, zieva ch'el gnit criticho il prüm dals fans pervi da sia politica da marcho. Pustüt gnit el inculpo da nun avair substituieu adequatamaing il giuveder central Felipe Melo, emigro a la Juventus Turin, squedra rivela da la Viola da vegl innò. Al cuntrari dals fans as solidarisettan la squedra e'l treneder unanimamaing cul demischiuno Della Valle.

Cronologia sportiva[modifitgar | modifitgar il code]

Stagiun Plazza Liga Remarcha
1926/27 6 Divisione 1, gruppa C
1927/28 2 Divisione 1, gruppa D
1928/29 16 Divisione Nazionale
1929/30 4 Serie B
1930/31 1 Serie B Promovida pella Serie A
1931/32 4 Serie A Pedro Petrone (25 gols) es champiun da gols insembel cun Angelo Schiavio (Bologna)
1932/33 5 Serie A
1933/34 6 Serie A
1934/35 3 Serie A
1935/36 12 Serie A
1936/37 9 Serie A
1937/38 16 Serie A Relegeda in Serie B
1938/39 1 Serie B Promovida in Serie A
1939/40 13 Serie A Guadagn da la prüma Coppa Italia
1940/41 3 Serie A
1941/42 9 Serie A
1942/43 6 Serie A
1943/44 Champiunedis na giuvos pervi da la Seguonda Guerra mundiela
1944/45 Champiunedis na giuvos pervi da la Seguonda Guerra mundiela
1945/46 5 Serie A
1946/47 17 Serie A
1947/48 7 Serie A
1948/49 8 Serie A
1949/50 5 Serie A
1950/51 5 Serie A
1951/52 4 Serie A
1952/53 7 Serie A
1953/54 3 Serie A
1954/55 5 Serie A
1955/56 1 Serie A Prüm Scudetto, 33 partidas consecutivas sainza sconfittas e 12 puncts d'avantag (actuel record taliaun)
1956/57 2 Serie A Finel da Coppa dals Champiuns d'Europa
1957/58 2 Serie A Finel da Coppa Italia
1958/59 2 Serie A 95 gols fats in 34 matsch (actuel record taliaun)
1959/60 2 Serie A Finel da Coppa Italia
1960/61 7 Serie A Seguond guadagn da la Coppa Italia, guadagn da la Coppa dals Vaindscheders da Coppas
1961/62 3 Serie A Aurelio Milani (22 gols) es champiun da gols insembel cun José Altafini (AC Milan), finel da Coppa dals Vaindscheders da Coppas
1962/63 6 Serie A
1963/64 4 Serie A
1964/65 4 Serie A Alberto Orlando (17 gols) es champiun da gols insembel cun Alessandro Mazzola (Inter Milaun), finel da Coppa Mitropa
1965/66 4 Serie A Terz guadagn da la Coppa Italia, guadagn da la Coppa Mitropa
1966/67 5 Serie A
1967/68 4 Serie A
1968/69 1 Serie A Seguond Scudetto sainza sconfittas d'utrò (actuel record taliaun)
1969/70 4 Serie A
1970/71 12 Serie A
1971/72 5 Serie A Finel da Coppa Mitropa
1972/73 4 Serie A
1973/74 6 Serie A
1974/75 8 Serie A Quart guadagn da la Coppa Italia
1975/76 9 Serie A
1976/77 3 Serie A
1977/78 13 Serie A
1978/79 6 Serie A
1979/80 6 Serie A
1980/81 5 Serie A
1981/82 2 Serie A
1982/83 5 Serie A
1983/84 3 Serie A
1984/85 9 Serie A
1985/86 4 Serie A
1986/87 9 Serie A
1987/88 8 Serie A
1988/89 7 Serie A
1989/90 12 Serie A Finel da Coppa UEFA
1990/91 12 Serie A
1991/92 12 Serie A
1992/93 16 Serie A Relegeda in Serie B
1993/94 1 Serie B Promovida pella Serie A
1994/95 10 Serie A Gabriel Batistuta (26 gols) es champiun da gols
1995/96 3 Serie A Tschinchevel guadagn da la Coppa Italia e guadagn da la Supercoppa taliauna
1996/97 9 Serie A
1997/98 5 Serie A
1998/99 3 Serie A Finel da Coppa Italia
1999/00 7 Serie A
2000/01 9 Serie A Sesevel guadagn da la Coppa Italia
2001/02 17 Serie A Relegeda in Serie B; concuors; fundaziun da la Florentia Viola, chi piglia part a la Serie C2
2002/03 1 Serie C2 Promovida pella Serie C1, Christian Riganò (30 gols) es champiun da gols; promovida directamaing pella Serie B per decisiun da la Federaziun taliauna da ballapè (F.I.G.C.) cul nom ACF Fiorentina
2003/04 6 Serie B Promovida in Serie A
2004/05 16 Serie A
2005/06 4 Serie A Luca Toni (31 gols) es champiun da gols e S-charpa d'Or scu meglder marcheder d'Europa
2006/07 5 Serie A Cun 31 gols piglios in 38 matsch es la meglder defaisa da Serie A. Cesare Prandelli es Treneder da l'an 2006.
2007/08 4 Serie A Semifinel da Coppa UEFA
2008/09 4 Serie A Cesare Prandelli es Treneder da l'an 2008
2009/10 11 Serie A Quart finel da Coppa Italia e ochevel finel da Champions League
2010/11 9 Serie A

Presidents[modifitgar | modifitgar il code]

  • 1926-1942 Luigi Ridolfi Vay da Verrazzano
  • 1942-1945 Scipione Picchi
  • 1945-1946 Arrigo Paganelli
  • 1946-1947 Igino Cassi
  • 1947-1948 Ardelio Allori
  • 1948-1951 Carlo Antonini
  • 1951-1961 Enrico Befani
  • 1961-1965 Enrico Longinotti
  • 1965-1971 Nello Baglini
  • 1971-1977 Ugolino Ugolini
  • 1977-1979 Rodolfo Melloni
  • 1979-1980 Enrico Martellini
  • 1980-1986 Ranieri Pontello
  • 1986-1987 Pier Cesare Baretti
  • 1987-1990 Lorenzo Righetti
  • 1990-1993 Mario Cecchi Gori
  • 1993-2002 Vittorio Cecchi Gori
  • 2002 Ugo Poggi
  • 2002 Leonardo Domenici
  • 2002 Ottavio Bianchi
  • 2002-2004 - Gino Salica
  • 2004-2009 - Andrea Della Valle
  • daspö 2009 - Mario Cognigni

Treneders[modifitgar | modifitgar il code]

Cesare Prandelli, Treneder da l'an 2006 e 2008
Delio Rossi
  • 1926-28 Károly Csapkay
  • 1928-30 Károly Csapkay e Gyula Feldmann
  • 1930-31 Gyula Feldmann
  • 1931-32 Hermann Felsner
  • 1932-33 Hermann Felsner, zieva William Rady
  • 1933-34 William Rady, zieva Ferenc Ging
  • 1934-37 Guido Ara
  • 1937-38 Ottavio Baccani, zieva Ferenc Molnár
  • 1938-39 Rudolf Soutscheck
  • 1940-43 Giuseppe Galluzzi
  • 1945-46 Giuseppe Bigogno
  • 1946-47 Guido Ara, zieva Renzo Magli, zieva Imre Senkey
  • 1947-51 Luigi Ferrero
  • 1951-52 Luigi Ferrero, zieva Renzo Magli
  • 1952-53 Renzo Magli, zieva Fulvio Bernardini
  • 1953-58 Fulvio Bernardini
  • 1958-59 Lajos Czeizler, zieva Luis Carniglia
  • 1959-60 Luis Carniglia
  • 1960-61 Giuseppe Chiappella, zieva Nándor Hidegkuti
  • 1961-62 Ferruccio Valcareggi
  • 1962-63 Ferruccio Valcareggi, zieva Giuseppe Chiappella
  • 1963-67 Giuseppe Chiappella
  • 1967-68 Giuseppe Chiappella, zieva Luigi Ferrero ed Andrea Bassi
  • 1968-70 Bruno Pesaola
  • 1970-71 Bruno Pesaola, zieva Oronzo Pugliese
  • 1971-73 Nils Liedholm
  • 1973-74 Luigi Radice
  • 1974-75 Nereo Rocco
  • 1975-78 Carlo Mazzone
  • 1978-81 Paolo Carosi, zieva Giancarlo De Sisti
  • 1981-85 Giancarlo De Sisti, zieva Ferruccio Valcareggi
  • 1985-86 Aldo Agroppi
  • 1986-87 Eugenio Bersellini
  • 1987-89 Sven-Göran Eriksson
  • 1989-90 Bruno Giorgi, zieva Francesco Graziani
  • 1990-92 Sebastião Lazaroni
  • 1992-93 Luigi Radice, zieva Aldo Agroppi, zieva Luciano Chiarugi
  • 1993-97 Claudio Ranieri
  • 1997-98 Alberto Malesani
  • 1998-2000 Giovanni Trapattoni
  • 2000-01 Fatih Terim, zieva Roberto Mancini
  • 2001-02 Roberto Mancini, zieva Ottavio Bianchi, zieva Luciano Chiarugi
  • 2002-03 Pietro Vierchowod, zieva Alberto Cavasin
  • 2003-04 Alberto Cavasin, zieva Emiliano Mondonico
  • 2004-05 Emiliano Mondonico, zieva Sergio Buso, zieva Dino Zoff
  • 2005-10 Cesare Prandelli
  • 2010-11 Siniša Mihajlović
  • 2011-12 Siniša Mihajlović, zieva Delio Rossi (daspö november 2011)

Meglders 10 giuveders per matschs e gols[modifitgar | modifitgar il code]

Giancarlo Antognoni

Situaziun: champiunedi taliaun 2010/11; matschs e gols be i'ls champiunedis naziunels.

Einsätze
1 Giancarlo Antognoni 1972–1987 341
2 Sergio Cervato 1948–1959 316
3 Giuseppe Chiappella 1939–1949 305
4 Kurt Hamrin 1958–1967 289
5 Gabriel Batistuta 1991–2000 269
6 Francesco Toldo 1993–2001 266
7 Giovanni Galli 1977–1986 259
8 Claudio Merlo 1965–1976 257
9 Giancarlo De Sisti 1965–1974 256
10 Augusto Magli 1941–1954 247
* = eir hoz illa Fiorentina
Tore
1 Gabriel Batistuta 1991–2000 168
2 Kurt Hamrin 1958–1967 150
3 Miguel Montuori 1956–1961 72
4 Alberto Galassi 1947–1952 63
5 Giancarlo Antognoni 1972–1987 61
6 Christian Riganò 2002–2005 58
7 Giuseppe Virgili 1954–1958 55
8 Adrian Mutu 2006-2011 54
9 Luca Toni 2005–2007 47
10 Alberto Gilardino* daspö 2008 46
* = eir hoz illa Fiorentina

Premis[modifitgar | modifitgar il code]

Concurrenzas naziunelas[modifitgar | modifitgar il code]

  • Champiunedi taliaun: 2 (1955/56, 1968/69)
  • Coppa Italia: 6 (1939/40, 1960/61, 1965/66, 1974/75, 1995/96, 2000/01)
  • Supercoppa taliauna: 1 (1996)

Concurrenzas internaziunelas[modifitgar | modifitgar il code]

Otras notizchas interessantas[modifitgar | modifitgar il code]

  • Dal 1957 füt la Fiorentina la prüma equipa taliauna chi ragiundschet il finel da la Coppa dals Champiuns d'Europa (hoz clameda UEFA Champions League), ma perdet 2-0 cunter il Real Madrid, la pü granda squedra da mincha epoca.
  • L'an 1961 guadagnet la Fiorentina la pruma Coppa dals Vaindscheders da Coppas as fan valair cunter il Glasgow Rangers, equipa pü ferma.
  • La Fiorentina es l'unic club taliaun chi grataget a vaindscher cunter ün'equipa inglaisa i'l vegl stadion da Wembley: dal 1999 superet 'la l'Arsenal. Siand cha'l stadion da Wembley gnit sbudo poch zieva, nu pudaro pü üngün club piglier davent tel record a la Viola.
  • Ün presüma, cha la culur violetta dal club as furmet be per cas. Già cha las maglias eiran oriundamaing alvas e cotschnas, tenor legenda perdettane la culur e dvantettane violettas, cur ch'ellas gnittan lavedas i'l flüm Arno.
  • L'imna uffiziela dal club es auncha hoz La Canzone Viola, cumponida düraunt ils ans Trenta dal 20. tschientiner da Marcello Manni (pleds) e Marco Vinicio (müsica); dal 1964 gnit il text modificho dal chantadur Narciso Parigi.

Fans[modifitgar | modifitgar il code]

Fans da la Fiorentina

Il club ho fat ferm risch a Firenza scu eir in Toscana, da la quela la Fiorentina es sainza dubi l'equipa da ballapè la pü importanta pervi da sia continuited in Serie A, ed ho bgers fans. Quist liam as manifesta na scu ultim in ün grand numer da possessurs d'abunamaints. Dafatta cur cha la squedra giuvet in Serie C2 düraunt il champiunedi 2002/03, det que 16.648 abunents; illa stagiun 1996/97 s'amuntet il numer dals abunamaints vendieus a 32.620.

Ils püs fanatischs, in occasiun dals gös a chesa, as chattan illa vart dal stadion "Artemio Franchi" clameda Curva Fiesole, inua ch'ün inscenescha düraunt ils matschs ils pü importants coreografias fich significativas e fös artifiziels. Surour Italia gnit cuntschaint il "purtret vivaint" da l'orizont da Firenza cun sieus monumaints, rapreschanto dals fans in occasiun da la partida cunter la Juventus Turin i'l champiunedi 1990/91.

Las activiteds dals fans vegnan coordinedas dal Centro di Coordinamento dei Viola Club e da la gruppa rivalisenta Associazione Tifosi Fiorentini, ma ad existan eir clubs autonoms. In tuot do que 282 "Viola Clubs" registros cun var 20.000 commembers; els as chattan pustüt - s'inclegia - a Firenza ed in Toscana, ma eir in l'Italia restanta ed a l'ester: uschè do que trais clubs i'ls Stedis Unieus da l'America, duos in Frauntscha, Granda Britannia ed Africa, ün in Spagna, Svizra, Rumenia, Albania, Russia, Malta, Giapun, China e Nouva Zelanda.

Eir scha tuot las gruppas nun as voulan bain las ünas las otras, sune daperüna davart il sustegn taunt scu pussibel da "lur" Fiorentina cun absolut ingaschamaint. Ellas as perinclettan eir davart il cumport invers ils vegls "inimihs mortels" da la Juventus Turin, que chi in passo ho chaschuno - melavita na d'inrer - eir violentas dispüttas traunter ils fans d'amenduos clubs in occasiuns d'inscunters directs. Impè haune üna stretta amicizcha culs fans da Hellas Verona e FC Turin.

Oters progets[modifitgar | modifitgar il code]

Commons
Commons
Commons: ACF Fiorentina – Collecziun da maletgs, videos e datotecas d'audio

Colliaziuns[modifitgar | modifitgar il code]