John Wesley

Ord Wikipedia
Jump to navigation Jump to search
Write.svg Questa pagina è scritta en puter.
John Wesley (sün üna statua davaunt l'universited nomeda zieva el ad Indiana) cun üna Bibgia i'l maun; la gesta es tipica per el: el driva la Bibgia sün üna pagina casuela sperand cha Dieu al maina inandret

John Wesley (* 2 da gün 1703 ad Epworth (Ingialterra); † 2 da marz 1791 a Londra) d'eira ün predichant dal movimaint da svagliamaint e'l fundatur da l'uschedit metodissem.

Vita[modifitgar | modifitgar il code]

Cur cha Wesley vaiva tschinch ans, gniva'l salvo our da sia chesa paterna in flammas. Quist'experienzcha l'accumpagnaiva fin a l'eted ota.

L'an 1728 artschaiva'l la consacraziun scu preir da la baselgia anglicauna.

L'an 1735 giava'l cun sieu frer Charles vi Giorgia in America dal Nord innua ch'els lavuraivan scu missiunaris. Düraunt il passagi faivan els cugnuoschentscha cun üna gruppa da la raspeda da frers dals Herrnhuters dal cunt tudas-ch Nikolaus Ludwig von Zinzendorf. Cur ch'ün orizi büttaiva la barcha vi e no, d'eira Wesley stut cu cha quistas persunas - homens, duonnas ed iffaunts - restaivan calmos tuottafat e chantaivan psalms. Ils mariners inglais invezza muossaivan trats da panica.

Zieva il retuorn ad Ingialterra faiva John Wesley ün'experienzcha interiura chi'l daiva dandettamaing la tschertezza plaina da salvamaint. L'impuls d'eira la lecziun da la charta dal apostel Paulus als Romauns e l'explicaziun da quist text biblic tres Martin Luther.

El faiva lura da predichant, suvenz suot tschêl aviert e davaunt milliuns d'audituors. Ultra da que s'ingaschaiva'l per quels a l'ur da la societed ed organisaiva'l chadafös da povrets. In quist reguard es el ün antecessur da la diaconia moderna.

Wesley vaiva surtut la pratscha dals Herrnhuters da lascher decider üna parola biblica chi vain tschernida pel cas scu ün motiv principel ed ün tschegn dal Segner per mincha di. Il pled biblic dess fer orienter al crettaivel che cha'd es da fer.

Colliaziuns[modifitgar | modifitgar il code]