Utilisader:Andreas/Plazzals/Druschauna
La Val Druschauna (tudestg ed aleman Walgau, m.) è ina vallada en il sid dal pajais federativ austriac Vorarlberg. Ella cunfina en il sid cun il Reticon ed en il nord cun la Val dal Rain. Il lieu il pli grond e l'unica citad da la val è Bludenz cun var 14'700 abitants. L'entira Val Druschauna dumbra var 48'000 abitants. Al sid da Bludenz cumenza il Montafun. La vallada vegn traversada dal flum Ill che suenter sbucca en il Rain.
Geografia[modifitgar | modifitgar il code]
La Val Druschauna cumenza sper Blundez e finescha en la Felsenau (Illschlucht) avant Feldkirch. La pli gronda chadaina da muntognas en il sid è il Reticon. Impurtantas muntagnas en la val èn la Zimberspitze a Bürs (Bludenz) nua ch'ins po raiver e las Drei Schwestern che prendan il num da lur trais spitgs.
La val è sa furmada cun la faudaziun da las Alps (35-30 milliuns onns). Durant l'epoca glaziala era tutta la Val Druschauna sco era tut il Vorarlberg cuvert d'in unic grond glatscher.
Istorgia[modifitgar | modifitgar il code]
Oriundamain aveva la Val Druschauna num Welschgau per tudestg. Fin il 13avel tschientaner era la val populada da Rumantschs. Tenor Durich Chiampell era il num rumantsch da la val Vutruschauna. En si'ovra Raetiae Alpestris Topographica Descriptio scriva el: „(…) ex antiqua inde consuetudine vocant ‚Vutruschauna‘, corruptius pro ‚Valdruschauna‘, id est Vallem Drusianam; (…)“, q.v.d. ...
Dialect[modifitgar | modifitgar il code]
En la Val Druschauna discurran ins, sco en quasi tut il Vorarlberg, in dialect aleman. Marcant per ils Oberländer è il diftong <ou> ed ils tuns dal bustab <a>, ma quai variescha en tutta la val. En cuntrast cun ils Unterländer è il Walgauerisch pli pauc influenzà dals dialects svizzers. Il dialect en la part bassa da la Val Druschauna posseda insaquantas caracteristicas dals dialects liechtensteinais. En ils vitgs pli en il sid sentan ins gia dapli il dialect dal Montafun.