Utilisader:Andreas/Plazzals/Terratrembel

Achtung! Infurmaziun da licenza: Questa baustelle dovra material dals artitgels Terratrembel da Tōhoku dal 2011 (cronologia) e Tōhoku-Erdbeben 2011 en la Wikipedia tudestga (cronologia).

---

Tokio

Sendai

Charta da l'epicenter dal terratrembel

Il terratrembel da Tōhoku dal 2011 è stà in grond terratrembel sutmarin avant la costa da Sanriku en la regiun giapunaisa Tōhoku. El ha gì lieu ils 11 da mars 2011 a las 14:46:23 uras temp local (05:46:23 uras UTC, pia 06:46:23 uras MEZ). Ses epicenter sa chattava avant la costa da la prefectura da Miyagi, var 370 km al nordost da Tokio e 130 km a l'ost da Sendai.

La fermezza dal terratrembel è vegnida inditgada da la United States Geological Survey (USGS) cun ina magnituda dal mument da 9,0 M_w. L'ipocenter sa chattava tenor questas indicaziuns en var 32 km profunditad. Era tenor las indicaziuns da l'Uffizi meteorologic giapunais (JMA) aveva il terratrembel ina fermezza da 9,0 M_w; l'ipocenter sa chattava tenor questas indicaziuns en ina profunditad da 24 km. A Kurihara en il nord da la prefectura da Miyagi ha la squassada cuntanschì l'intensitad maximala da 7 sin la scala giapunaisa.

L'event vala sco pli ferm terratrembel en il Giapun dapi l'entschatta da la registraziun da terratrembels en la regiun ed ha era chaschunà duas autras catastrofas: in tsunami cun fin 10 meters autezza ed accidents en pliras ovras atomaras en l'ost dal Giapun, oravant tut en la centrala Fukushima Daiichi.

Survista tectonica

Survista tectonica da la regiun

Tge vul quai dir? → Tectonica da plattas

Il terratrembel en la vischinanza da la costa orientala da Honshū ha gì lieu sco resultat d'ina ruttadira inversa (Überschiebung) al cunfin cumplex tranter la Platta Pacifica e la Platta Nordamericana. En questa zona sa mova la Platta Pacifica cun ina sveltezza da 83 mm per onn vers il vest relativ a la Platta Nordamericana.

Questa sveltezza dal spustament dals continents (Kontinentaldrift) è dentant ina valur media, che durant activitad seismica normala è considerablamain pli bassa, fin a quel punct che la tensiun stagnada vegn dada libra tut andetg entras in terratrembel. En connex cun il terratrembel da Tōhoku hai da tenor emprimas stimaziuns in moviment brusc dad almain 5 meters.

Vi dal Foss dal Giapun (Japangraben) sa mova la Platta Pacifica sut il bratsch meridiunal da la Platta Nordamericana e subducescha ensemen cun ella vinavant vers il vest sut la Platta Eurasiana. Varsaquants seismologs sutdividan questa regiun en pliras microplattas, che en la combinaziun provocheschan ils moviments tranter las Plattas Pacifica, Nordamericana ed Eurasiana. Quai pertutga oravant tut la Microplatta d'Ochotsk e la Microplatta da l'Amur en la part respectiva da l'America dal Nord e da l'Eurasia.

Dapi l'onn 1973 avevan lieu vi dal Foss dal Giapun nov events seismics cun ina magnituda pli gronda che 7. Il pli ferm da quels terratrembels ha gì lieu il december 1994 cun ina fermezza da 7,8 e ses epicenter sa chattava var 230 km al nord dal terratrembel da Tōhoku. Sia consequenzas han mazzà trais persunas e bunamain 700 èn vegnidas blessadas. In terratrembel cun ina magnituda da 7,7 e cun epicenter 75 km pli al nord ha chaschunà la mort da 22 persunas e passa 400 blessads. Il december 2008 han gì lieu quatter terratrembels moderads (magnituda 5,3–5,8) en in conturn da 20 km tar il center dal terratrembel da Sendai.

Decurs dal terratrembel

Charta dal terratrembel dals 11 fin 14 da mars 2011
hellgrün: 11.3.2011, gelb: 12.3.2011, orange: 13.3.2011, rot: 14.3.2011

Terratrembels anteriurs

Il terratrembel vegniva precedì da plirs terratrembels anteriurs (Vorbeben) significants, che entschavevan ils 9 da mars cun in terratrembel cun ina magnituda da 7,2 M_w (l'epicenter dal qual sa chattava var 40 km dalunsch da l'epicenter dal terratrembel da Tōhoku) e suandà la notg suenter da trais auters terratrembels cun ina magnituda da dapli che 6,0 M_w.

Terratrembel principal

Il terratrembel entschaveva relativamain plaun cun moviments verticals ferms, las uschenumnadas undas primaras. Suenter in temp betg inditgà exactamain (ca. 20 fin 30 secundas) vegnivan moviments orizontals u undas secundaras fitg pli fermas vitiers. Ella demussavan dentant ina frequenza fitg bassa, q.v.d. moviments pli plauns. Silsuenter sa moveva il solum cun moviments rullants cumparabels cun ils moviments d'ina bartga durant Seegang mesaun. Quests moviments rullants vegnivan a l'entschatta accumpagnads da stremblidas secundaras en in interval da paucas minutas. Il terratrembel principal aveva ina durada totala da circa 5 minutas. (Descripziun d'in seismolog che durant il terratrembel sa chattava a Kashiwa en la prefectura da Chiba, 345 km dalunsch da l'epicenter)

Geofisica

Tenor indicaziuns dal Center da prescrutaziun per geoscienzas a Potsdam en la Germania ha il terratrembel aifer trais minutas stgarpà si la crusta da la terra sin ina lunghezza da 400 km e giu fin 60 km profunditad. Igl ha dà moviments da plattas da fin 27 m orizontal e 7 vertical. Il terratrembel ha provocà ina sbassada da las costas, p.ex. da 40 m ad Onahama en la prefectura d'Iwaki u da 75 cm a Minamisanriku, quai che ha augmentà il privel d'inundaziun a las costas.

Il terratrembel ha spustà l'insla principala dal Giapun per 2,4 meters vers l'ost e l'axa da figura da la terra per 16 centimeters. Ultra da quai è sa midada la distribuziun da massas sin il mund, quai che ha sminuì il mument d'inerzia da la terra cun il resultat che dapi lura la terra sa volva in pau pli spert. La durada d'in di è sa reducida per 1,8 microsecundas.

Intensitad seismica

Intensitad seismica sin la scala giapunaisa (JMA) dad 1 fin 7

La zona nua che il terratrembel era perceptibel – pia cun intensitad shindo da 1 u pli aut sin la scala giapunaisa (JMA) – cumprendeva tut las quatter inslas principalas dal Giapun. Las consequenzas las pli fermas dal terratrembel tanschavan fin al nordost da la regiun gronda da Tokio, cun shindo da 6-jaku („6 bassa“) u pli aut en las suandantas regiuns:

Pli auta intensitad seismica (tenor la Scala JMA) / 6 u pli auta

Intensitad max.	Prefectura	Citads pertutgadas
7	Miyagi	Kurihara
6+	Fukushima	Shirakawa, Sukagawa, Nihonmatsu, Kagamiishi, Naraha, Tomioka, Ōkuma, Futaba, Namie, Shinchi
6+	Ibaraki	Hitachi, Chikusei, Hokota
6+	Miyagi	Wakuya, Tome, Ōsaki, Natori, Zaō, Yamamoto, Sendai: Bezirk Miyagino, Shiogama, Higashi-Matsushima, Ōhira
6+	Tochigi	Ōtawara, Utsunomiya, Mooka, Takanezawa
6-	Chiba	Narita, Inzai
6-	Fukushima	Kōriyama, Kōri, Kunimi, Kawamata, Nishigō, Nakajima, Yabuki, Tanagura, Tamakawa, Asakawa, Ono, Tamura, Date, Iwaki, Sōma, Hirono, Kawauchi, Iitate, Minamisōma, Inawashiro
6-	Gunma	Kiryū
6-	Ibaraki	Mito, Hitachi-Ōta, Takahagi, Kita-Ibaraki, Hitachinaka, Ibaraki, Tōkai, Hitachi-Ōmiya, Omitama, Tsuchiura, Ishioka, Toride, Tsukuba, Kashima, Itako, Bandō, Inashiki, Kasumigaura, Namegata, Sakuragawa, Tsukubamirai
6-	Iwate	Ōfunato, Kamaishi, Takizawa, Yahaba, Hanamaki, Ichinoseki, Ōshū
6-	Miyagi	Kesennuma, Minamisanriku, Shiroishi, Kakuda, Iwanuma, Ōgawara, Kawasaki, Watari, Sendai: Stadtbezrike Aoba, Wakabayashi, Izumi, Ishinomaki, Matsushima, Rifu, Taiwa, Tomiya
6-	Saitama	Miyashiro
6-	Tochigi	Nasu, Nasushiobara, Haga, Nasukarasuyama, Nakagawa

Energia dal terratrembel

Durant il terratrembel principal è vegnida dada libra in'energia da 3,9 · 10²² joule. Stgamià correspunda quai ad 83 giadas il basegn d'energia mundial (relativ al 2009) u, cun in equivalent en TNT da 9,3 gigatonnas, a l'energia da 780 milliuns bombas da Hiroshima.

Terratrembels posteriurs

Dumber dals terratrembels posteriurs

1. emna	M≥5,0	M≥6,0	M≥7,0	2. emna	M≥5,0	M≥6,0	M≥7,0
11 da mars	120	30	3	18 da mars	6	0	0
12 da mars	73	9	0	19 da mars	9	2	0
13 da mars	33	5	0	20 da mars	8	0	0
14 da mars	27	2	0	21 da mars	3	0	0
15 da mars	14	2	0	22 da mars	11	4	0
16 da mars	11	2	0	23 da mars	11	1	0
17 da mars	12	0	0	24 da mars	3	0	0

Tenor datas da la United States Geological Survey (USGS) suandaven suenter il terratrembel principal numerus terratrembels posteriurs. Il pli grev cun ina magnituda da 7,9 M_w ha gì lieu ina mes'ura pli tard a las 15:15 uras (temp local). Avant, vers las 15:06 uras (temp local), hai gia dà dus squass ferms cun ina fermezza da 6,4 M_w.

Fin ils 24 da mars ha l'Uffizi meteorologic giapunais registrà en il pajais 352 terratrembels posteriurs cun ina magnituda da 5,0 u dapli, 59 cun ina magnituda da 6,0 u dapli e 3 cun ina magnituda da 7,0 u dapli.

Tsunami

Giapun

En il Giapun ha il tsunami inundà ina surfatscha da 470 kilometers quadrats. A Minamisanriku haja il tsunami cuntanschì 16 meters autezza.

Ils 11 da mars 2011, paucas minutas suenter il terratrembel, ha l'Uffizi meteorologic giapunais avertì d'in tsunami cun fin sis meters autezza per la costa da la prefectura da Miyagi. Per las prefecturas limitrofas Iwate e Fukushima han ins quintà cun be 3 meters autezza e per il rest da l'entira costa orientala dal Giapun cun 0,5 fin 2 meters. Per cas ha la regenza giapunaisa publitgà be in di avant il tsunami in video d'infurmaziun davart tsunamis che cuntegna era instrucziun da cumportament.

En realitad ha il terratrembel dentant provocà in tsunami cun fin 10 meters autezza a las costas da Sendai e Sanriku che ha devastà ina strivla da costa da fin 10 kilometers ladezza sin ina lunghezza da plirs tschient kilometers, oravant tut en la regiun enturn Sendai. Pertutgada era tut la costa nordorientala da l'insla Honshū con las prefecturas da Fukushima, Miyagi ed Iwate en la regiun Tōhoku. Devastaziuns grevas hai dà en las citads Hachinohe, Kamaishi, Kesennuma, Minamisanriku, Rikuzentakata, Onagawa e Sendai. Las vischnancas Ōtsuchi, Miyako, Hirono, Yamada ed ils vitgs Noda, Tanohata, Fudai en la prefectura d'Iwate èn vegnids donnegiads fermamain.

A Sendai è l'eroport vegnì inundà. En la regiun enturn Sendai è il tsunami entrà lunsch viaden en la terra ed ha lavà davent bastiments, autos e chasas. A Hochinohe èn grondas navs vegnidas lavadas sin la terra. A Kesennuma èn suenter ruts ora fieus che han chaschunà incendis en grondas parts da la citad. In bastiment da passagiers cun 100 persunas a bord è vegnì piglià dal tsunami. Las citads da Minamisanriku e Rikuzentakata èn vegnidas devastadas cumplettamain dal tsunami, 10'000 persunas eran l'emprim sparidas.

Avant la costa dad Oarai èn sa furmads gronds turnigls en la mar, sco gia tar tsunamis precedents. In tren da l'East Japan Railway Company (JR East) è svià sin la lingia d'Ōfunato en l'areal da la staziun da Nobiru a Higashi-Matsushima, cun il resultat che nov passagiers èn stuì vegnir salvads or dad el. Quatter ulteriurs trens sin la lingia da Senseki, la lingia d'Ōfunato e la lingia da Kesennuma valevan sco sparids.