Utilisader:D.Camenisch/Cudeschs/Africa dal Sid/Introducziun
La Republica da l'Africa dal Sid è in pajais culturalmain fitg divers, en il qual vivan umans da pliras etnias (uschenumnada Rainbow Nation). Ma questa convivenza n'è betg adina stada senza conflicts: la suppressiun da la populaziun originara da colur naira tras ils colonisaturs europeics dueva culminar en la segunda mesadad dal 20avel tschientaner en il chapitel somber da l'apartheid.
Suenter il 1990 è la segregaziun da las razzas però vegnida terminada successivamain. Nelson Mandela, il manader carismatic da l'opposiziun – ch'aveva passentà blers onns en praschunia – è la finala daventà president dal stadi. Ozendi n'èn ils problems socials e da razza bain betg surmuntads dal tuttafatg. Ma tuttina sa sviluppa al sid dal continent in nov stadi, segnà da la speranza da pudair laschar davos sai las ingiustias dal temp dal colonialissem.
Questa publicaziun sa cumpona da l'artitgel da survista ‹Africa dal Sid› e vegn cumplettada a la fin d'intginas chartas geograficas. La part principala porscha infurmaziuns detagliadas davart ils suandants temas:
- Survista
- Geografia
- Populaziun
- Istorgia
- Politica
- Dretg
- Militar
- Administraziun e sutdivisiun administrativ
- Economia
- Infrastructura da traffic
- Problems dal pajais
- Furmaziun
- Medias
- Cultura
La versiun preschenta dal cudesch è vegnida preparada per la stampa il zercladur 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.